«Samuryq-Qazyna» bıyl qansha paıda tabýdy josparlap otyr
«Samuryq-Qazyna» aktsıonerlik qoǵamy kompanııalar toby bıyl 1,8 trln teńge taza paıda tabýdy josparlap otyr. Muny brıfıng barysynda qordyń Ekonomıka jáne qarjy jónindegi teń basqarýshy dırektory Mırat Ótepov aıtty, dep habarlaıdy Kazinform.
«Aldyn ala baǵalaý boıynsha, «Samuryq-Qazyna» AQ kompanııalar tobynyń 2023 jylǵy taza paıdasy 1,8 trln teńge deńgeıinde kútilýde. Munaı jáne gaz naryqtarynda qalyptasqan jaǵdaıdy jáne óndiristik kórsetkishterdi jaqsartý boıynsha qabyldanyp jatqan sharalardy eskeretin bolsaq, bul jaqsy nátıje sanalady», - dedi Mırat Ótepov.
Spıker túsimge birneshe faktor teris áser etkenin atap ótti. Birinshisi – munaı baǵasynyń tómendeýi. Qazirgi ýaqytta 1 barrel munaıdyń baǵasy shamamen 80 dollar. Ol byltyr 105 dollar bolǵan edi. Ekinshisi – baǵanyń tómendeýi saldarynan Qazaqstannan eksporttalǵan gaz kólemi azaıǵan. Sonymen qatar el ishinde gazǵa suranys artqan.
Bıyl «Samuryq-Qazyna» AQ shamamen 658 mlrd teńgeni memleket paıdasyna baǵyttaıdy. ıAǵnı, bul soma dıvıdend tóleýge, áleýmettik jobalar men qaıyrymdylyqqa jumsalady. Aldyn ala derekke saı, osy aqshanyń 146 mlrd teńgesi respýblıkalyq bıýdjetke, 353 mlrd-y áleýmettik salaǵa baǵyttalady. Sondaı-aq aktıvterdi jekeshelendirý qorytyndysy boıynsha memleket qazynasyna qosymsha 92 mlrd teńge túsedi.
