Samokattarǵa arnalǵan jolaqtar salý qajet – Májilis depýtaty
«Qazir samokat mingen adamdar qatary artyp keledi. Biz munyń qozǵalys úshin qajetti qural ekenin bilemiz. Samokattar ekologııalyq turǵydan zııandy emes. Sonymen qatar, bul jańa bıznes. Ol 15 myń adamdy jumyspen qamtýǵa qaýqarly. Almatyda bir kúnde samokattar 50-60 myń ret qoldanylady. Samokattar esebinen kúndelikti 30 myń kólik ketpeliste turmaıdy. Degenmen, máseleniń kelesi ushy bar. Máselen, samokatqa mingen jasóspirimder erejelerdi bilmeıdi. Eger olar jaıaý júrginshilerdi qaǵyp ketse, onda olar jaza arqalamaıdy. Oqıǵa ornynan qashyp ketýge tyrysady. Ol samokat bolǵandyqtan, ereje buzǵan adamdy tabý múmkin emes. Sondyqtan naqty ereje men talap, jaýapkershilik engizý kerek», - dedi Sergeı Ponomarev.
Depýtat pikirinshe, samokattardyń qatysýymen bolǵan oqıǵalardyń statıstıkasyn júrgizip, ereje buzǵandarǵa arnaıy jaýapkershilik engizý qajet.
«Eger samokat mingenderge kólik jolymen júrýge ruqsat bersek, onda júrgizýshiler olardy soǵyp ketýi múmkin. Al, samokat qoldanýshylaryn trotýarǵa jibersek, olar qarapaıym júrginshilerdi qaǵyp ketedi. Bizde arnaıy joldar az. Osylardy sheshý úshin ınfraqurylymdy damytý kerek. Qazirgi kezde samokattardy Astana, Almaty, Shymkent qalalarynda jappaı paıdalanýǵa engizýge bolady. Alaıda, bizde basqa da óńirler bar emes pe?! Sondyqtan tıisti ınfraqurylym jasaý kerek. Ol úshin qarajat bólý kerek», - dep toqtaldy ol.
Depýtat osy oraıda Frantsııadaǵy uqsas jaǵdaıdy eske aldy. Ol memleket azamattardyń jeke samokattarymen júrýine ruqsat bergenimen, jappaı jalǵa berý oryndaryna tyıym saldy. Sergeı Ponomarev máseleni qysqa qaıyryp, sheshe salýǵa bolmaıtynyn aıtty. Onyń paıymynsha, kez kelgen ýaqytta shekteý engizýge bolady. Biraq, bastysy - ınfraqurylymdy jaqsartyp, turǵyndardy ekologııalyq taza kólikti qoldanýǵa úndeý.
