Samarqandaǵy sammıtti Eýropa basylymdary qalaı tápsirlep jatyr

ASTANA. KAZINFORM – Agenttiktiń arnaıy tilshisi Samarqanda ótken Eýropalyq Odaq – Ortalyq Azııa birinshi sammıti týraly Eýropa baspasózi ne jazǵanyn sholyp kórdi.

Eýroodaqtyń jetekshi basylymy «Euractiv» forýmǵa jeke materıal arnady. Avtorlar Eýropalyq Odaq Ortalyq Azııadaǵy pozıtsııasyn nyǵaıtý úshin 12 mıllıard eýro bólýge ýáde bergenin jazady. Sonymen birge, Eýrokomıssııa prezıdenti Ý. Leıen Eýroodaqtyń aımaqpen jumys tásili Reseı men Qytaı saıasatynan ózgeshe ekenin atap ótken.

- Investıtsııalyq pakettiń ishinde óńirdegi asa mańyzdy shıkizatqa 2,5 mlrd eýro, Ortalyq Azııa elderi arqyly Qytaıdy Eýropamen baılanystyratyn saýda jolyn damytýǵa 3 mlrd eýro, ekologııalyq jobalarǵa 6,4 mlrd eýro jáne tsıfrlyq baılanysqa 100 mln eýro baǵyttalmaq, - delingen maqalada.

Euronews telearnasy Samarqandtaǵy sammıttiń kadrlaryn kórsetti. Reporter Elıs Taıdı Eýroodaq Qazaqstandaǵy jáne aımaqtyń basqa da memleketterindegi asa mańyzdy shıkizat resýrstaryna asqan qyzyǵýshylyq tanytyp otyrǵanyn málim etti.

- Samarqanda (Ózbekstan) ótken EO-Ortalyq Azııa birinshi sammıti AQSh prezıdenti Donald Tramptyń EO jáne Ulybrıtanııa sııaqty odaqtastardy ondaǵan elge baj salyǵyn engizgennen keıin eki kún ótip, álemdegi kóshbasshylar jańa baj saıasatyn synap jatqan kezde bastaldy. Jańa jahandyq kedergiler paıda bolyp, ınvestıtsııalardyń baǵyty ózgeredi nemese azaıady. Dúnıe júzindegi derjavalar arasyndaǵy yqpal teńgerimi ózgerip jatyr», — dedi Eýropalyq komıssııanyń tóraǵasy Ýrsýla fon der Leıen.

- Bul sózderdiń AQSh, Reseı, Qytaı úshtigine qarata aıtylǵanyn bári boljap otyr, - dep habarlady Euronews.

Týrızm salasyna mamandanǵan «Travel tomorrow» basylymy sammıt aıasynda vızalyq rejımdi jeńildetýde ilgerileý bolǵanyn jazdy.

- Eki tarap Qazaqstan men Eýropalyq komıssııa arasynda vıza berý protsesin jeńildetýge baǵyttalǵan kelissózderdiń ilgerilegenin rastap otyr. Bul bastama týrıstik jáne iskerlik alys-beristi, barys kelisti yntalandyrýǵa, sol arqyly Qazaqstan men EO-ǵa múshe memleketter arasyndaǵy baılanysty nyǵaıtýǵa baǵyttalǵan. Qazaqstan azamattary Eýropa baǵytynda osyndaı ońtaıly baılanys ornaǵanyn kóp kútti.

Qazaqstan iskerlik yntymaqtastyqty, týrızmdi jáne adamı baılanystardy damytýǵa umtyla otyryp, 2017 jyly EO-nyń barlyq elderiniń azamattary úshin vızasyz rejımdi engizdi. Endi Qazaqstan azamattary EO-ǵa barý úshin vızalyq talaptardy jeńildetýdi asyǵa kútýde.

Osyǵan baılanysty Qazaqstan bilikti mamandar men tsıfrlyq kóshpendilerdi tartý úshin vıza alý múmkindikterin keńeıtti. Úkimet elge talanttar men ınnovatsııalardyń kelýin yntalandyrýǵa arnalǵan vızalardyń úsh jańa sanatyn engizdi, - dep jazady basylym.

EU Reporter gazeti QR Prezıdenti Q.Toqaev pen EK basshysy Ý. Leıenniń jeke kezdeskenin atap ótedi.

- Samarqanda ótken alǵashqy tarıhı «Ortalyq Azııa — Eýropalyq Odaq» sammıtinde Qazaqstan prezıdenti Qasym-Jomart Toqaev Eýropalyq komıssııanyń tóraǵasy Ýrsýla fon der Leıenmen mańyzdy ekijaqty kezdesý ótkizip, EO men Qazaqstan arasyndaǵy qarym-qatynastyń serpindi jáne jan-jaqty damyp jatqanyn atap ótti, - delingen gazette.

EU Reporter Eýropalyq Odaqtyń resýrstarǵa baı jáne strategııalyq aımaqta ornalasqan, senimdi seriktes izdeýi Qazaqstannyń qubylmaly álemde ekonomıkalyq jáne geosaıası baılanystardy ártaraptandyrýǵa degen umtylysymen sáıkes kelgenin jazady.

Prezıdent Q.Toqaev keńeıtilgen áriptestik pen yntymaqtastyq týraly kelisim EO men Qazaqstan qatynastarynyń zańdy jáne dıplomatııalyq negizi bolyp qala beretinin atap ótti. 2015 jyly qol qoıylǵan jáne 2020 jyly kúshine engen qujat yntymaqtastyqtyń 29 salasyn qamtıdy.

Q.Toqaev Qazaqstan EO-men yntymaqtastyqty damytýǵa daıyn tórt strategııalyq basym baǵytty usyndy.

Olar:

- Energetıka, onyń ishinde dástúrli kómirsýtekter men asa mańyzdy shıkizat, sonymen qatar jasyl energııa men sýtegi. Infraqurylymdyq jáne ónerkásiptik jobalar. Bul baǵyt Eýropanyń ınvestıtsııasymen Qazaqstan ónerkásibin jańǵyrtatyn tehnologııalardy qamtıdy.

- Kólik jáne logıstıka. Qazaqstannyń Transkaspıı halyqaralyq kólik dáliziniń boıynda ornalasýy basty faktor.

- Tsıfrlyq ınnovatsııalar, ozyq tehnologııalar jáne jasandy ıntellekt. Bul salalarda Qazaqstan birlesken zertteýler men tsıfrlyq transformatsııa jónindegi bastamalardy ǵana alǵa shyǵaryp qoımaı, Eýropanyń ınnovatsııalyq ekojúıelerine ıntegratsııalanýǵa umtylady.

- Vızalyq rejımdi ońaılatý. Q.Toqaev pen Ý.Fon der Leıen Qazaqstan men EO arasyndaǵy vızalyq rejımdi ońaılatý týraly kelisim rásimderiniń bastalǵanyn shekaralar men bıýrokratııany eńserýdi qos tarap ta quptap otyrǵan mańyzdy oqıǵa retinde atady. Bul Eýropa blogynyń Qazaqstanǵa degen senimi men ózara yntymaqtastyq ósip kele jatqanyn kórsetedi.

Buǵan deıin Samarqand qalasynda resmı bastaý alǵan jańa saıası ıntegratsııa Qazaqstanǵa qandaı múmkindik syılaıtynyn saraptaǵan edik.