Samarqanda Qazaqstannyń bas konsýldyǵy ashyldy
Saltanatty sharaǵa Qazaqstannyń Ózbekstan Respýblıkasyndaǵy elshisi Darhan Satybaldy men Samarqan oblysynyń ákimi Erkınjon Týrdımov qatysty, dep habarlaıdy QazAqparat.
«Samarqanda Qazaqstan Respýblıkasynyń bas konsýldyǵynyń ashylýy – bizdiń memleket basshylarynyń ýaǵdalastyǵynyń nátıjesi. Búginde Ózbekstan –Qazaqstannyń Ortalyq Azııadaǵy eń iri saýda seriktesi, onyń úlesine óńir elderimen taýar aınalymynyń jalpy kóleminiń 50%-dan astamy tıesili. Óz kezeginde ózbek bıznesi qazaqstandyq naryqty belsendi ıgerýde. Osynyń barlyǵy memleket basshylary Qasym-Jomart Kemeluly Toqaev pen Shavkat Mıromonuly Mırzıeevtiń kúsh-jigeriniń, Qazaqstannyń Tuńǵysh Prezıdenti – Elbasy Nursultan Ábishuly Nazarbaevtyń arnaıy úles qosýynyń arqasynda jasalyp jatyr», – dedi D. Satybaldy quttyqtaý sózinde.
Qazaqstandyq dıplomattyń aıtýynsha, Samarqan Ózbekstannyń strategııalyq ortalyǵy sanalady jáne mańyzdy týrıstik, ekonomıkalyq jáne kólik áleýetine ıe. Sol sebepti Samarqanda bas konsýldyqtyń ashylýy kezdeısoq emes.
«Aıta ketý kerek, Samarqan búginde qazaqstandyq týrıster úshin ǵana emes, bıznes salasynda da tartymdy ortalyq bolyp otyr. Qalanyń tarıhy baı ótkeni, sondaı-aq jarqyn bolashaǵy bar. Jýyq arada Samarqan mıllıoner qala mártebesine ıe bolady. Bul onyń saıası mártebesin arttyryp, týrıstik múmkindikterin keńeıtedi, sondaı-aq ınvestıtsııalyq tartymdylyǵyn kúsheıtedi. Samarqan qalasyndaǵy bas konsýldyqtyń qyzmeti Qazaqstan men Ózbekstan arasyndaǵy tatý kórshilik qarym-qatynastardy jandandyrýǵa eleýli úles qosatynyna senimdimin», – dedi Darhan Satybaldy.
Samarqan oblysynyń basshysy E. Týrdımov eki eldiń strategııalyq yntymaqtastyǵyn keńeıtý maqsatyna tolyq sáıkes keletin qazaqstandyq dıplomatııalyq mıssııany ashýdyń tarıhı mańyzdylyǵyn atap ótti.
«Mundaı aıtýly oqıǵa tarıhymyzda qalatyny sózsiz. Biz Qazaqstannyń Samarqandaǵy bas konsýlyna barynsha qoldaý kórsetemiz. Qazaqstan-Ózbekstan qarym-qatynastarynyń sapaly jańa deńgeıde damýy baýyrlas eki halyqtyń uzaq merzimdi dostyq múddelerine tolyq jaýap beretinin jáne Ortalyq Azııa óńirleriniń beıbitshilikti, turaqtylyqty, qaýipsizdikti jáne jedel damýyn qamtamasyz etýdiń mańyzdy faktory bolatynyn aıtqym keledi», – dedi Samarqan oblysynyń ákimi Erkınjon Týrdımov.
