Salmaq tastaýshylar arasynda tanymal Ozempic preparaty týraly ne bilemiz
ASTANA. KAZINFORM – Ozempic preparaty álemde keńinen tanymal. Internettegi aqparattarǵa súıensek, ol Gollıvýd juldyzdarynyń arasynda da suranysqa ıe sekildi. Sheteldik BAQ-tyń jazýynsha, keıbir ártister qyzyl kilemde jarqyrap júrý úshin osy preparatqa júginedi eken. Baıqaǵanymyzdaı, bul tásil Qazaqstanǵa da jetipti. Osy oraıda, agenttik tilshisi máseleni tarqatyp kórgen edi.
Preparatty qoldanyp júrgen patsıenttiń pikiri
Astanalyq boıjetken Aıdana Qoshqarbaıdyń atalǵan preparatty qoldanyp júrgenine úsh aıǵa jýyqtapty. Osy ýaqyt aralyǵynda 8 keli salmaq tastaǵan.
«Preparatty endokrınolog dárigerdiń nusqaýy boıynsha qabyldaımyn, sebebi mende ınsýlınrezıstenttilik bar jáne analızder nasharlady, sondyqtan meniń endokrınolog dárigerim osy preparatty taǵaıyndady. Óz basym bul preparatty eshqashan artyq salmaqtan arylý maqsatynda qabyldaýǵa keńes bermeımin», - deıdi elorda turǵyny.
Sondaı-aq, patsıent áńgime barysynda preparattyń ózine oń áser etip jatqanyn aıtyp qaldy.
«Maǵan oń áser etip jatyr, ıaǵnı tábetti jáne densaýlyqty baqylaý turǵysynan ǵana emes, sonymen qatar psıhologııalyq jaǵdaıym men jaqsy kóńil kúıde júrýime septigin tıgizedi. Ózimdi jaqsy sezinemin, eshqandaı keri áseri bolǵan joq. Al salmaq tastaý jaǵynan kelsek, dárini qabyldap jatqaly 3 aıdyń ishinde eshqandaı kúsh jumsamaı 8 kelige aryqtadym», - dep jeke tájirıbesin bólisti astanalyq arý Aıdana Qoshqarbaı.
Dáriger mamandar ne deıdi?
«Ozempic®- jańa gıpoglıkemııalyk-farmatsevtıkalyq preparat. Ony 2 tıpti qant dıabeti, burynnan qant dıabetimen kúresip kele jatqan patsıentterge, oǵan qosa júrek qan tamyr júıesinde asqynýlary bar naýqastarǵa, semizdik, ıaǵnı dene salmaǵy ındeksi 30-dan joǵary sonymen qatar ınsýlınrezıstenttilik belgileri bar patsıentterge nusqaýlyqqa sáıkes taǵaıyndaıdy», - deıdi endokrınolog Aıgúl Jumamurat.
Mamannyń aıtýynsha, qazir artyq salmaqtan tez arylý maqsatynda bul preparatty dárigerdiń nusqaýynsyz qoldanyp júrgender jetkilikti. Ol - medıtsınalyq turǵydan qate.
«Sebebi, ár dárilik preparattyń oń áseri men janama jáne qarsy kórsetkishteri bar. Sonymen ár adamnyń aǵzasyna baılanysty, bireýge jaqqanymen, ekinshige keri áserin tıgizýi múmkin. Sondyqtan da aryqtaý maqsatynda osy jáne basqa dári-dármekti qoldanar aldynda analız tapsyryp, endokrınolog mamanynyń keńesin alǵan jón», - deıdi ol.
Sondaı-aq, maman qant dıabetimen kúreske arnalǵan preparattyń artyq salmaqtan arylýǵa qatysy týraly aıtyp berdi.
«Farmakoterapııalyk áseri boıynsha birinshiden, uıky bezinen ınsýlın gormonynyń óndirilýin joǵarylatady jáne glıýkagon (ınsýlınge qarsy áser) gormonynyn sekretsııasyn tómendetedi, sonyń nátıjesinde qandaǵy qant mólsheri azaıady. Ekinshiden, asqazannyń motorıkasyn tómendetý arkyly, adam uzaq ýakytqa deıin toq júredi. Úshinshiden, mıdaǵy as qorytý, tábet ortalyǵyna áseri bar, osy oraıda adamda uzaq ýaqytqa deıin ashtyq sezimi týyndamaıdy», - dep túsindirdi endokrınolog.
Odan bólek, bul dári retsept boıynsha aryqtaýǵa arnalmaǵandyqtan janama áseri de bar eken.
«Eń jıi kezdesetini - asqazan, ishek joldary aýrýlarynyń asqynýy. Ol degenimiz - júrek aıný, qusý, ish ótý, ish qatý, ishtiń jeldenýi taǵy sol sııaqty. Sonymen qatar preparatty qabyldaý barysynda salaýatty ómir saltyn ustanǵan abzal, oǵan qosa durys tamaqtaný da mańyzdy. Sebebi, preparatty qoldanýdy toqtatqan jaǵdaıda joǵalǵan salmaq qaıta qalpyna kelý qaýpi bar. Taǵy bir eskeretin jaıt, sońǵy júrgizilgen meta analız boıynsha atalǵan preparat pen oǵan balama dárilerdi qalqansha bezi qaterli isigine shaldyǵý qaýpi joǵary ekeni anyqtaldy», - dep eskertti maman.
Osylaısha Aıgúl Jumamurat aryqtaý marafonynda jeńimpaz bolyp turǵan preparatty dárigerdiń baqylaýymen qoldanǵan durys dep otyr. Onyń aıtýynsha, aryqtaýdyń tabıǵı joly - durys tamaqtaný, salaýatty ómir saltyn ustaný, onyń ishinde sport ta bar jáne zııan ádetterden aýlaq bolý.
Ozempic elimizde tirkelgen be?
Densaýlyq saqtaý mınıstrliginiń redaktsııa joldaǵan saýalǵa jaýabynda bylaı delingen:
«Qazaqstan Respýblıkasynda memlekettik tizilimde Ozempic® (MNN Semaglýtıd) dárilik preparaty tirkelgen. Óndirýshi Danııa eliniń Novo Nordisk farmatsevtıkalyq kompanııasy».
Resmı aqparatta aıtylǵandaı, preparattyń mólsheri (doza) 1,5 ml jáne 3 ml bolyp ekige bólinedi jáne olardyń elimizde tirkelý merzimi bar. Atap aıtqanda, 1,5 ml doza Ozempic® preparaty 17.09.2025 jylǵa deıin, al 3 ml 04.09.2025 jylǵa deıin tirkelgen.
Preparatty medıtsınalyq qoldaný jónindegi nusqaýlyqqa sáıkes:
- eresek patsıentterde 2 tıpti qant dıabetin baqylaý qanaǵattanarlyqsyz jaǵdaıǵa jetkende dıeta úshin jáne fızıkalyq belsendilikti arttyrýǵa qosymsha qoldanýǵa;
- metformındi nusqaýlyq orynsyz taǵaıyndalǵan kezde tózimsizdikke nemese qarsy kórsetilimderge baılanysty monoterapııa retinde;
- qant dıabetinen emdeý barysynda basqa dári-dármekke qosymsha preparat retinde. Basqa preparattar qataryna metformın, tıazolıdındıondar, 2 tıpti natrıı-glıýkoza kotransorter ıngıbıtorlary (NGLT-2)) nemese ınsýlın.
«Ozempic® dárilik preparaty dárigerdiń retsepti boıynsha beriledi jáne farmatsevtıkalyq qyzmet etýge tıisti lıtsenzııasy bar dárihanalarda ǵana satylýy tıis. Sondaı-aq, ruqsaty bar dárihanalar retsept boıynsha preparatqa qatysty qosymsha sharttardy, sonyń ishinde preparatty qoldanar aldynda retsepti qatań saqtaýy kerek», - dep tolyqtyrdy mınıstrlikten.
Osylaısha, Ozempic® preparatyn qant dıabetimen kúreste bolsyn, aryqtaý úshin bolsyn dárigerdiń nusqaýynsyz qoldanýǵa bolmaıdy, ıaǵnı tek retsept boıynsha satylady. Osy oraıda elordanyń birneshe dárihanasyn aralap, Ozempic® preparaty satyla ma dep surap kórgen edik. Biz barǵan dárihanalar (4 dárihana – red.) preparattyń satylymda joq ekenin aıtty.
Odan bólek, onlaın saýda qyzyp turǵan zaman ǵoı dep ınternetten qarap kórdik, i-teka.kz dárihanalar jáne dári-dármek anyqtama qyzmetinde Ozempic® preparaty erkin satylymda bar bolyp shyqty. Baǵasy 58 000 teńgeden bastalyp 120 000 teńgege deıin barady. Onyń ishine 1 mg (0,68 mg, 1,34 mg nemese 2,68 mg semaglýtıd) ınektsııa úshin eritindi, shprıts ınesimen qosa beriledi.
