Salyqtyq shegerim alý úshin qandaı qujat qajet — maman jaýaby
ASTANA. KAZINFORM — Salyqtyq shegerim alý úshin rastaýshy qujattyń túrine baılanysty. Atalǵan múmkindik týraly tolyǵyraq Qarjy mınıstrligi Memlekettik kirister komıtetiniń salyq ádisnamasy basqarmasy basshysynyń orynbasary Aıgúl Abbasova aıtyp berdi.
— Mysaly, oqý boıynsha salyqtyq shegerim alý úshin oqý týraly shart jáne oqý aqysyn tólegenin rastaıtyn qujat qajet. Sondaı-aq oqý boıynsha salyqtyq shegerimdi jeke tulǵanyń ózi ǵana emes, 21 jasqa tolmaǵan balasynyń paıdasyna da qoldana alady, — dedi Aıgúl Abbasova Memlekettik kirister komıtetinde onlaın ótken is-sharada.
Kirister komıteti ókiliniń málimdeýinshe, jeńildik barlyq bilim berý qyzmetine qatysty emes.
— Oqý boıynsha salyqtyq shegerim mektepke deıingi bilimge, kásibı-tehnıkalyq jáne joǵary bilimge jumsalǵan shyǵystarǵa qoldanylady. Orta bilim berý bul tizimge kirmeıdi, ıaǵnı bala jeke mektepte oqysa, onda salyqtyq shegerim qoldanýǵa quqy joq, — dep túsindirdi maman.
Sondaı-aq spıker medıtsınalyq shyǵysqa qatysty qandaı qujat qajettigin aıtty.
— Bul jerde rastaıtyn qujattar qatarynda, medıtsınalyq qyzmet kórsetý sharty, qajetti medıtsınalyq qyzmet kórsetilgen aýrý tarıhynan úzindi. Eger bul shegerim erikti medıtsınalyq saqtandyrý sharty boıynsha saqtandyrý syıaqysyn tóleýdi qamtysa, onda shart jáne osy saqtandyrý syıaqysyn tólegenin rastaıtyn qujat qajet talap etiledi, — deıdi salyq ádisnamasy basqarmasy basshysynyń orynbasary.
Odan ári Kirister komıtetiniń ókili kópbalaly otbasylar salyqtyq shegerim úshin qandaı qujat tapsyrý kerektigin aıtty.
— Kópbalaly otbasyǵa arnalǵan salyqtyq shegerim úshin 2025 jylǵy 1 qańtarǵa deıin 18 jasqa tolmaǵan balalardyń týý týraly kýáligi qajet, — dedi ol.
Onyń aıtýynsha, salyqtyq shegerim múmkindigin qoldaný úshin erli-zaıypty zańdy nekede bolyp, tórt nemese odan da kóp balany tárbıeleýi tıis. Ata-ana salyqtyq shegerimdi qoldanýǵa ótinish bergende, atalǵan jeńildikti ózi paıdalanatynyn ne paıdalanbaıtynyn rastaýy kerek. Óıtkeni, shegerimdi eki jubaı da nemese tek bireýi qoldana alady.
Aıta ketsek, bıyl tamyzda salyqtyq tirkeýdiń jańa qaǵıdalary usynyldy.
Sondaı-aq 2026 jyldan bastap elimizde salyq salasynda qandaı ózgerister bolatyny týraly jazǵan edik.