Salyq tólemeýdiń qandaı keri saldary bar
ASTANA. KAZINFORM – Salyq tólemeýdiń saldary aýyr bolýy múmkin. Ósimpul eselenip, tipti qylmystyq ta jaýapkershilikke tartylýyńyz yqtımal. Osy oraıda salyq konsýltanty Kazinform agenttiginiń tilshisimen suhbattasý barysynda boryshkerlerge qandaı sharalar qoldanylatyndyǵyn túsindirdi.
Múlik, kólik jáne jer salyǵy boıynsha qaryz
Jeke tulǵalar salyqty der ýaqytynda tólemegen jaǵdaıda qaıta qarjylandyrýdyń 1,25 eselengen resmı mólsherlemesi kóleminde ósimpul eseptelinedi.
Tóleýden bas tartqan jaǵdaıda materıal májbúrlep óndirip alý úshin jeke sot oryndaýshylaryna beriledi. Óz kezeginde jeke sot oryndaýshylary mynadaı sharalardy qoldanady:
- Qazaqstan aýmaǵynan tysqary jerge shyǵýǵa shekteý qoıý
- tirkeý is-qıyl jasaýǵa shekteý qoıý
- salyq tóleýshiniń múlkin buǵattaý
- bank esepshottar boıynsha shyǵys operatsııalaryn toqtatý
- boryshkerdiń ózin tutqynǵa alý.
Jeke kásipkerler men zańdy tulǵalar salyq tólemin keshiktirse...
QR Ákimshilik quqyq buzýshylyq týraly kodeksiniń 279-baby 2-tarmaǵynda salyqty tóleý merzimin keshiktirý nemese somany tolyqtaı tólemegeni úshin mynadaı aıyppuldar kózdelgen:
- jeke notarıýstar, jeke sot oryndaýshylary, advokattar, shaǵyn bıznes sýbektileri nemese kommertsııalyq emes uıym – 5 AEK (19 660 teńge)
- orta kásipkerlik sýbektileri – 10 AEK (39 320 teńge)
- iri kásipkerlik sýbektileri – 20 AEK (78 640 teńge).
- Bul rette eger salyq tóleýshi tólem somasyn ózi anyqtap, 3 jumys kúni ishinde qosymsha salyq esep-qısabyn berý arqyly tolyq aýdarsa aıyppul tólemeıdi.
Salyq deklaratsııasyn der ýaqytynda tapsyrmaý
QR Ákimshilik quqyq buzýshylyq týraly kodeksiniń 272-babyna sáıkes, memlekettik kiris organyna salyq eseptiligin Qazaqstan Respýblıkasynyń zańnamalyq aktilerinde belgilengen merzimde usynbaý - eskertý jasaýǵa ákep soǵady. Al qaıtalanǵan jaǵdaıda mynadaı somada aıyppul tóleýge týra keledi:
- jeke tulǵalar – 15 AEK (58 980 teńge)
- jekeshe notarıýstar, jeke sot oryndaýshylary, advokattar, shaǵyn kásipkerlik sýbektileri nemese kommertsııalyq emes uıymdar – 30 AEK (117 960 teńge)
- orta kásipkerlik sýbektileri – 45 AEK (176 940 teńge)
- iri kásipkerlik sýbektileri – 75 AEK (272 240 teńge).
Deklaratsııadaǵy qate
Eger qujatta qate nemese durys emes derek ketse, onda salyq tóleýshi ony óz betinshe túzete alady. Ol úshin 3 jyldyq talap merzimi sheginde qosymsha deklaratsııa tapsyrý qajet.
Sheteldegi aktıvterdi jasyrý
Sheteldegi kirisin jasyratyn nemese sheteldegi múlkin deklaratsııalamaǵan jeke tulǵalar úshin 100 AEK mólsherinde (393 200 teńge) aıyppul kózdelgen. Osy oraıda 2025 jyldan bastap Qazaqstan halyqaralyq salyq aqparattaryn almasý júıesine belsendi qatysatyndyǵyn qaperde ustaý mańyzdy.
Qandaı jaǵdaıda bank esepshotty buǵattaıdy?
Salyq bereshegine baılanysty esepshottardy buǵattaý tek jeke kásipkerler men zańdy tulǵalarǵa qatysty. Bul sharalar jeke tulǵalarǵa qoldanylmaıdy.
Protsedýra kelesideı: aldymen, salyq tóleýshige qaryz týraly habarlama jiberiledi. Eger salyq tóleýshi habarlamany elemese jáne bereshegin ótemese, onda salyq organy salyq tóleýshiniń banktik esepshottary men salyq tóleýshi kassasy boıynsha operatsııalardy toqtatady.
Buǵattaý jedeldigi salyq tóleýshiniń qandaı táýekel sanatyna kiretindigine baılanysty:
- táýekeldiń joǵary deńgeıi – habarlamadan soń 1 jumys kúninen keıin
- táýekeldiń orta deńgeıi – 10 jumys kúninen keıin.
Qaryz ótelgennen keıin 1 jumys kúniniń ishinde buǵat alynady.
Qandaı jaǵdaıda qylmystyq jaýapkershilikke tartýy múmkin?
Salyq qylmystaryn izgilendirý maqsatynda QR Qylmystyq kodeksinde qylmystyq is qozǵaýdyń shekti máni ulǵaıtyldy. Osyǵan baılanysty salyq salý salasyndaǵy ákimshilik quqyq buzýshylyq týraly baptyń sanktsııasyndaǵy aıyppuldar mólsheri ulǵaıtyldy (ÁQBtK-niń 275, 278, 280-baptary).
Endi ÁQBtK-niń 275-babynda jasyryn salyq salý obektisi boıynsha tóleýge jatatyn salyq jáne basqa da mindetti tólemder somasynyń 200 paıyzy mólsherinde ákimshilik jaýapkershilik kózdelgen. Buǵan deıin aıyppul 150 paıyz edi.
Bir jyl ishinde qaıtalap jasalǵan quqyq buzýshylyq salyq jáne basqa da mindetti tólemder somasynyń 200 paıyz emes, 300 paıyz mólsherinde aıyppul salýǵa ákep soǵady.
Salyq tóleýshi úshin qylmystyq jaýaptylyq iri somada – 50 000 AEK-ten astam salyqtardy tólemegen jaǵdaıda týyndaıdy, eger soma bir jyldaǵy barlyq salyqtardyń 10 paıyzdan astamyn qurasa.
Deklaratsııany usynbaý, deklaratsııaǵa kirister nemese shyǵystar týraly ádeıi burmalanǵan málimetterdi engizý, salyq salýdyń basqa obektilerin nemese basqa da mindetti tólemderdi jasyrý jolymen salyqty nemese bıýdjetke tólenetin basqa da mindetti tólemderdi tóleýden jaltarý, eger bul is-áreket iri mólsherde salyqty tólemeýge ákep soqsa, 2 000 aılyq eseptik kórsetkish mólsherine deıin aıyppul salýǵa nemese:
- dál sondaı mólsherde túzetý jumystaryna tartýǵa
- 800 saǵatqa deıin merzimge qoǵamdyq jumysqa tartýǵa
- 3 jylǵa deıin bas bostandyǵyn shekteýge
- dál sondaı merzimge belgili laýazymda qyzmet atqarý quǵynan aıyra otyryp bas bostandyǵynan aıyrýǵa alyp keledi.
Aıta keteıik, 25 maýsymda Parlament jańa Salyq kodeksin bekitken edi.