Salyq reformasy: Mańǵystaý kásipkerleri Úkimetke usynystaryn aıtty
AQTAÝ. KAZINFORM — QR ulttyq ekonomıka vıtse-mınıstri Baýyrjan Omarbekov pen QR qarjy mınıstrligi Memlekettik kirister komıteti tóraǵasynyń orynbasary Jánibek Nurjanov Aqtaý qalasynda bıznes-qoǵamdastyqpen kezdesti.

200-ge jýyq kásipker qatysqan kezdesý barysynda jańa Salyq kodeksi jáne onyń bızneske áseri talqylandy.
QR ulttyq ekonomıka vıtse-mınıstri Baýyrjan Omarbekov óz sózinde Úkimet azyq-túlik, áleýmettik mańyzy bar taýarlar baǵasynyń ósýine jol bermeý úshin mıkro jáne shaǵyn bıznesti QQS tóleýden tolyq bosatý múmkindigin qarastyryp jatqanyn atap ótti.
QR memlekettik kirister komıteti tóraǵasynyń orynbasary Jánibek Nurjanov qosylǵan qun salyǵy bıýdjetti toltyrýdyń negizgi kózderiniń biri bolyp sanalatynyna toqtaldy. Biraq salyq salý salasyndaǵy reforma kásipkerlerdiń ǵana emes, jalpy halyqtyń múddesin qozǵaıtyndyqtan, talqylaýlar bıznes-sarapshylardyń qatysýymen ashyq túrde ótkiziledi.
— Memleket basshysynyń tapsyrmasyna baılanysty barlyq óńirde bıznes ókilderimen kezdesýler ótip jatyr. Úkimet Sizderdiń naqty usynystaryńyzdy muqııat taldap, aldaǵy ýaqytta Parlamentke usynady, — dedi Jánibek Nurjanov.
Mańǵystaýlyq kásipkerler qoǵamda belsendi talqylanyp jatqan qosylǵan qun salyǵy týraly pikir bildirdi.
— QQS mólsherlemesiniń ósýi shaǵyn bızneske áser etýi múmkin. Tabysy joǵary jáne QQS tólemeıtin ekonomıkanyń iri sektorlaryna saralanǵan salyq salýdy usynamyz, — dedi Óńirlik keńestiń tóraǵasy Jalǵas Myrzaǵalıev.
Sondaı-aq ol oıyn bıznesi ásirese joǵary kirisi bar sala ekenin atap ótti. Atalǵan bıznes túrine de salyq salý ádil qadam bolady. Bul bıýdjetke aıtarlyqtaı kiris ákelýi múmkin.
— Úkimet ókilderi aımaqqa kelip, jańa Salyq kodeksin túsindirip jatqany óte oryndy. Biz de óz usynysymyzdy aıttyq. Bul jerde kásipkerler men Úkimet óz ustanymdaryn bildiretin pikirtalas alańy uıymdastyryldy. Kásipkerlerdiń pikirin eskerý mańyzdy. QQS ósimi bıýdjetke túsetin salyq túsimderin ulǵaıtýǵa tıis. Alaıda, eger tutyný azaıyp, bıznestiń bir bóligi kóleńkege ketse, tıimdilik kútilgennen az bolýy múmkin, — dep atap ótti «TaxServiceKz» JShS dırektory Jasulan Serik.
Keńes barysynda kásipkerler ózderin tolǵandyratyn suraqtar qoıyp, salyq saıasatynyń árbir ózgerisi kezinde bıznes ókilderiniń pikiri eskerilýi tıis ekenin qadap aıtty.
Qorytyndylaı kele, QR ulttyq ekonomıka vıtse-mınıstri Baýyrjan Omarbekov pen Memlekettik kirister komıteti tóraǵasynyń orynbasary Jánibek Nurjanov aıtylǵan barlyq usynys-tilekterdi qaperge alamyz dep ýáde berdi.
Eske salsaq, budan buryn Premer-mınıstrdiń orynbasary — Ulttyq ekonomıka mınıstri Serik Jumanǵarın Almatyda bıznes ókilderimen kezdeskenin jazdyq. Bul rette Úkimet taǵy bir usynysyn aıtyp, eger QQS 16% bolsa, áleýmettik salyq pen zeınetaqy jarnalaryn tóleý ózgerissiz qalatynyn alǵa tartqan edi.