Salyq organdarynda bıometrııalyq sáıkestendirý engiziledi

ASTANA. KAZINFORM — Qarjy mınıstrligi kóleńkeli ekonomıkamen kúresý maqsatynda bıometrııalyq sáıkestendirý engizýdi josparlap otyr.

Qujat jobasy «Ashyq NQA» portalynda jarııalandy. 

Qujatta kórsetilgendeı, atalǵan bastamanyń maqsaty — salyq tóleýshiler úshin ashyq jaǵdaı jasaý jáne jalǵan shot-faktýralardy jazyp berý táýekelin azaıtý.

Jańa qaǵıda kompanııalardyń qarjylyq-sharýashylyq qyzmetine qatysy joq tulǵalardyń aralasýyn boldyrmaý arqyly baqylaýdy kúsheıtýge múmkindik beredi. Bul kóleńkeli ekonomıkanyń úlesin tómendetýdegi mańyzdy qadam bolmaq.

Bıometrııalyq sáıkestendirýdi engizý memlekettik kirister organdarynyń jumys tıimdiligin arttyryp, ózara esep aıyrysý kezinde derekterdiń shynaıylyǵyn qamtamasyz etýge yqpal etedi dep kútiledi. Joba eshqandaı teris áleýmettik-ekonomıkalyq nemese quqyqtyq saldarǵa ákelmeıdi, tek burynnan bar fýnktsıonaldy nyǵaıtyp, ony qurylymdalǵan ári ashyq etedi.

Aıta ketsek, qujat Salyq kodeksine engizilgen ózgerister týraly zańdy iske asyrý aıasynda ázirlenip otyr. Jańa qaǵıdalardy engizý, salyq protsesin tsıfrlandyrý men eldegi qarjylyq tártipti nyǵaıtý strategııasynyń bir bóligi. 

Qazaqstanda bıometrııa túrli salada qoldanylyp keledi, atap aıtqanda, sot kabıneti men memlekettik qyzmet portalynan bastap onlaın-kredıt berý, bank pen mıkroqarjy uıymdarynda shot jáne karta ashýǵa deıin. 

Qujat 2025 jylǵy 20 tamyzǵa deıin qoǵamdyq talqylaýǵa usynylyp otyr. 

Eske salaıyq, buǵan deıin mamandandyrylǵan halyqqa qyzmet kórsetý ortalyqtarynda bıometrııalyq sáıkestendirý engizildi.