Salyq kodeksin ázirleý sheńberinde usynylǵan sharalar talqylandy
ASTANA.KAZINFORM - Premer-mınıstrdiń bıýdjettik-salyqtyq saıasatty reformalaýdyń jańa tásilderin ázirleý týraly tapsyrmasyna sáıkes, vıtse-premer – Ulttyq ekonomıka mınıstri Serik Jumanǵarın UEM janyndaǵy Saraptamalyq keńestiń birinshi otyrysyn ótkizdi.
Úkimettiń baspasóz qyzmeti habarlaǵandaı, keńes otyrysyna qarjy mınıstri Mádı Takıev, Ulttyq bank tóraǵasynyń orynbasary Aqyljan Baımaǵambetov, ulttyq ekonomıka vıtse-mınıstri Azamat Ámrın, 20-dan astam sarapshy, onyń ishinde, iri qarjylyq, ınvestıtsııalyq, taldaý jáne konsaltıngtik uıymdardyń, Qazaqstan qarjygerler qaýymdastyǵy keńesiniń, «Atameken» UKP basshylary qatysty.
Jıynǵa qatysýshylar bıýdjet tabystylyǵyn arttyrý sharalaryn, atap aıtqanda, jańa Salyq kodeksin ázirleý sheńberinde usynylǵan jańa jáne qazirdiń ózinde usynylǵan sharalar keshenin talqylady.
Qatysýshylardyń kópshiligi kodekstiń jańa redaktsııasynda usynylyp otyrǵan birqatar qoldanystaǵy salyq jeńildigin alyp tastaý, bankter men qarjy uıymdary úshin korporatıvtik tabys salyǵynyń (KTS) mólsherlemesin arttyrý, memlekettik baǵaly qaǵazdar boıynsha syıaqylarǵa salyq salýdy engizý merzimderin 2030 jyldan 2026 jylǵa aýystyrý, oıyn bıznesine salyq salýdy qaıta qaraý jónindegi sharalarmen kelisti.
Atalǵan sharalar jıyntyǵynda bıýdjetke túsetin kirister tabystylyǵyn 1 trln teńgeden astamǵa arttyrýǵa arnalǵan. Alaıda, bul sharalar shyǵyndar men bıýdjet kiristeri arasyndaǵy qalyptasqan alshaqtyqty jabý úshin jetkiliksiz. Keńeste atap ótilgendeı, jyl saıyn bıýdjetke túsetin salmaq artyp keledi, áleýmettik shyǵyndar ósýde, al ekonomıkanyń naqty sektoryn damytý bıýdjet shyǵystarynyń 10%-ynan azyn qurap otyr. Salyqtyq-bıýdjettik salalarda reformalarsyz jaǵdaıdy túzeý múmkin emes.
Kezdesýge qatysýshylar aqsha-nesıe jáne fıskaldyq saıasat arasyndaǵy teńgerimsizdikti teńestirý ári salyq salý júıesiniń tıimdiligin arttyrý boıynsha óz pikirleri men usynystaryn ortaǵa saldy.
- 2025 jyl Qazaqstan úshin ońaı bolmaıdy. Biz ótken jyldardaǵy keıinge qaldyrylǵan uzaq ýaqytqa sozylǵan reformalardy qabyldaýǵa májbúr bolamyz. Bul – memleket óziniń áleýmettik mindettemelerin oryndaýdy jalǵastyra alatyndaı baǵany naryqtyq jaǵdaıǵa keltirý. Ókinishke qaraı, qazir salyqtarǵa qatysty jaǵdaıdy túzetý, olardy ákimshilendirýdi jaqsartý, tipti keıbir jaǵdaılarda mólsherlemelerdi qaıta qaraý úshin birqatar tanymal emes reformalardy qabyldaýymyz kerek. Eń bastysy, muny Ulttyq qordy saqtaý úshin emes, ekonomıkanyń naryqtyq ekonomıkaǵa aınalýy úshin jasaýymyz kerek. Jańa Salyq kodeksi, búgin biz talqylaǵan usynystardyń keıbiri kóp uzamaı kópshiliktiń ıgiligine aınalady. Men barlyǵyn óz pikirin aıtýǵa shaqyramyn, — dedi «NAC Analytica» KQ» (NU) basqarma tóraǵasy Rasýl Rysmambetov.
- Búgin biz QR Ulttyq ekonomıka mınıstrligimen daıyndalyp jatqan jańa Salyq kodeksi týraly áńgime qozǵadyq. Sóz usynylyp jatqan kóptegen ózgerister týrasynda boldy. Sol sebepti qazir qarastyrylyp jatqan Salyq kodeksi eń aldymen elimizdiń bolashaǵy úshin óte mańyzdy. Árıne, salyqtyq ákimshilendirýdi jaqsartý, salyq mólsherlemesin kóterý nemese azaıtý syndy kóptegen usynystar bar. Osy oraıda bizge halqymyzdyń bolashaǵyn jaqsartýǵa úles qosatyn sheshimder qajet. Búgingideı kezdesýlerdiń mańyzdylyǵy da osynda jatyr, — dep atap ótti ekonomıst Ǵalymjan Aıtqazın.
Aıta keteıik, Parlament Senaty Qarjy jáne bıýdjet komıtetiniń tóraǵasy Sultanbek Mákejanov Jibek Joly telearnasyna bergen suhbatynda bıýdjet tapshylyǵyn joıýdyń úsh jolyn atady.