Salyq bereshegin óndirý tártibi jeńildetildi
ASTANA. KAZINFORM — QR Qarjy mınıstrligi Memlekettik kirister komıtetiniń Bereshekpen jumys basqarmasynyń basshysy Qaısar Aryn áleýmettik jelidegi tikeleı efırde 2026 jyldyń 1 qańtarynan bastap salyq bereshegin óndirý tártibi qalaı ózgergenin túsindirdi.
— Endi 20 AEK-ke (86 500 teńge) deıingi bereshegi bar kásipkerlerge tek habarlama jiberilip, ósimpul esepteledi. Shottary buǵattalmaıdy, qyzmetine kedergi keltirilmeıdi. Habarlamada salyq tóleýshiniń qansha qaryzy bar ekeni kórsetiledi, — dedi Qaısar Aryn.
20–45 AEK aralyǵyndaǵy (86 500–194 625 teńge) bereshegi bar kásipkerlerdiń banktik shottary men kassa operatsııalary ýaqytsha toqtatylýy múmkin. Al 45 AEK-ten joǵary bereshegi bar kásipkerlerge barlyq yqpal etý sharalary qoldanylady. Olarǵa boryshkerdiń ózine qaryz bolyp turǵan adamdar men kompanııalardan qarajat óndirý, múlikti tekserip satý, baǵaly qaǵazdardy tárkileý, qajet bolsa, sot arqyly bankrot dep taný kiredi.
— Sonymen qatar alǵash ret 1 500 AEK-ke deıingi bereshegi bar kásipkerlerge, sondaı-aq gorızontaldy monıtorıngke qatysýshylarǵa 12 aıǵa deıin kepilsiz bólip tóleý múmkindigi berildi. Endi bólip tóleý úshin múlikti baǵalaý nemese saqtandyrý talaptaryn oryndaýdyń qajeti joq, al tóleý merzimi burynǵydan aıtarlyqtaı qysqardy, — dep tolyqtyrdy komıtet ókili.
Salyq organy ókiliniń aıtýynsha, Úkimet tapsyrmasy aıasynda mıkro jáne shaǵyn bıznes úshin jańa jeńildikter engiziledi. Eger kásipker 1 qańtardan 31 naýryzǵa deıin negizgi qaryzyn tólese, eseptelgen ósimpuldar men aıyppuldar keshirilýi múmkin. Zań resmı túrde qabyldanyp, jarııalanǵannan keıin komıtet jeńildikti qalaı paıdalaný keregin, kimderge beriletinin, merzimi men tártibin tolyq túsindiredi.
Aıta keteıik, biz buǵan deıin salyq kodeksine qandaı ózgeris enýi múmkin ekenin jazǵan edik.