«Salamatty Qazaqstan»: shalǵaı aýyldardaǵy 100 myńǵa jýyq adamǵa kómek kórsetildi
Shalǵaı aýyldarda medıtsınalyq kómek kórsetýge arnalǵan «Salamatty Qazaqstan» poıyz-jobasy 8 aıda Qazaqstannyń 17 oblysyn aralap shyqty. Densaýlyq kerýenine «Samuryq-Qazyna» qory birneshe jyldan beri qarjylyq qoldaý kórsetip keledi, dep habarlaıdy Kazinform.
Relstegi emhana
Bıylǵy sáýir aıynda Almatydan jolǵa shyqqan medıtsınalyq poıyz 18 myń shaqyrym jol júrip, shalǵaı jatqan 121 stantsııada boldy jáne Jambyl oblysynda saparyn aıaqtady.
«Salamatty Qazaqstan» – pandemııadan keıin qaıta qosylǵan jobalardyń biri. Ótken jyly «Medıtsınalyq poıyzdar» jobasynda eki baǵytta eki poıyz júrgen edi. Bıyl jobanyń tıimdiligin arttyrý úshin eki baǵytty biriktirip, 121 stantsııany qamtı alatyn bir ǵana poıyzdy jaldadyq, 590 mln teńge qarjy bólindi. Bul qarajat poıyzda jumys isteıtin azamattardyń tamaqtanýy, poıyzdyń júrý shyǵyndaryna, poıyzdyń sapaly qyzmet etýine qarastyryldy. Al mamandardyń eńbekaqysy Densaýlyq saqtaý mınıstrligi esebinen óteldi», - dedi «Samuryq-Qazyna» AQ «Samruk-Kazyna Trust» áleýmettik jobalardy damytý qorynyń bas dırektory Alfııa Adıeva Ortalyq kommýnıkatsııalar qyzmetinde ótken baspasóz máslıhatynda.
Bul poıyz oblys ortalyǵynan alys, shalǵaı óńirlerge, aýyldarǵa baryp, eki kúnnen aıaldady. Árbir aýylda 100 turǵynnan 2 myń turǵynǵa deıin halyq osy poıyzda qyzmet alǵan.
«Bul jobanyń mańyzy óte zor. Óıtkeni osynyń arqasynda halyq densaýlyǵyn jaqsartýǵa, alys aýdandar men aýyl turǵyndaryna qajet qyzmet túrlerin qoljetimdi etýge múmkindik týady. Onyń ústine bıyl medıtsınalyq mamandar quramyna alǵash ret medıator men zańger qosyldy. Ótken jyly 80 myńdaı halyqty qamtysaq, bıyl quqyqtyq keńesti qosqanda, 98 myńnan astam halyqqa medıtsınalyq jáne quqyqtyq kómek kórsetilgen. Joba 88 994 qazaqstandyqtyń densaýlyǵyn jaqsartýǵa úles qosty, onyń ishinde 19 myńnan astam bala bar», - dedi spıker.
Poıyz ishinde 11 myń shaǵyn ota jasaldy
«Salamatty Qazaqstan» poıyzy japon jáne nemis medıtsınalyq qural-jabdyǵymen tolyqtaı jabdyqtalǵan. Qajet bolǵan jaǵdaıda tolyq jalpy jáne bıohımııalyq taldaýlardy, rentgenografııa jáne flıýorografııa, ishki organdar men tamyrlardy ýltradybystyq zertteý, elektrokardıogramma, gastrofıbroskopııa, dıagnostıkalyq zertteýler júrgize alady.
«Bul medıtsınalyq poıyz erekshe. Ol medıtsınalyq jumysqa arnalǵan, zamanaýı jabdyqtalǵan 8 vagonnan turady. Sonymen qatar quramynda vagon-meıramhana, barlyq medıtsınalyq jabdyqtyń úzdiksiz jumysyna jaýap beretin vagon-dızel-generator bar. Al, qýaty TJ kezinde shaǵyn eldi mekendi qamtamasyz etýge jetedi. Taǵy 2 vagon qyzmetkerlerge arnalǵan», - deıdi «Qazaqstan temir joly» UK AQ» janyndaǵy Áleýmettik jobalar qorynyń dırektory Erbol Keńgirbaev.
Bıylyǵy jobada 35-ten astam dáriger jáne zańger, medıator maman qyzmet kórsetken. Onyń ishinde terapevt, pedıatr, kardıolog, nevropatolog, kóz dárigeri, LOR, gınekolog, hırýrg, ýrolog, stomatolog syndy bilikti mamandar bolǵan.
«Dárigerler alǵashqy medıtsınalyq-sanıtarlyq kómek, konsýltatsııalyq-dıagnostıkalyq kómek qyzmetterin usynyp, zerthanalyq zertteýler júrgizdi. Poıyz ishinde 11 myńǵa jýyq shaǵyn hırýrgııalyq ota jasaldy, 11 myńnan astam patsıentke stomatologııalyq kómek kórsetildi, joǵaryda aıtylǵandaı 19 myńnan astam balaǵa qyzmet usynyldy. Tekserý qorytyndysy boıynsha ártúrli aýrýlary bar 8 700-ge jýyq azamat anyqtaldy, onyń 8 400-i dınamıkalyq baqylaýǵa alyndy», - dedi QR DSM Medıtsınalyq kómekti uıymdastyrý departamenti dırektorynyń orynbasary Gúlnar Sársenbaeva.
Poıyzdyń bas dárigeri Aınur Eginbaevanyń aıtýynsha, turǵyndardy tekserý kezinde qant dıabeti, glaýkoma, lıpoma, artroz, sozylmaly holetsıstıt, sozylmaly pankreatıt, búırektiń jáne analyq bezderdiń kıstalary, týa bitken júrek aqaýy, júreksheler qalqasynyń aqaýy aýrýlary jıi anyqtalǵan. Onkologııalyq aýrýlardan bólek, bronhıt, pnevmonııa, gastrıt ta baıqalǵan. Turǵyndardyń arasynda nevropatolog, hırýrg, kóz, qulaq jáne muryn dárigerlerine suranys kóp bolǵan.
Alǵash ret medıatorlar shalǵaı aýyldarǵa bardy
Bıyl «Samruk-Kazyna Trust» qory Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa usynysymen «Salamatty Qazaqstan» medıtsınalyq poıyzyna alǵash ret medıator men zańger mamandardy qosty. Osylaısha medıtsınalyq poıyz 10 myńǵa jýyq zańgerlik jáne medıatıvtik kómek kórsetip úlgergen.
Ulttyq komıssııa ókili, zańger-medıator, Halyqaralyq medıatsııa ınstıýtytynyń basshysy Janar Úsipbekovanyń málimetinshe, poıyzda 9 802 adamǵa aqysyz quqyqtyq jáne medıatıvtik, ıaǵnı, tatýlastyrý kómegi kórsetildi.
«Onyń ishinde, 5 myńy - zańgerlik keńes, 3 myńnan astamy – medıatıvtik konsýltatsııa, 500 medıatıvtik kelisimshartqa qol qoıyldy, ıaǵnı zańger men medıator azamattardyń máselesin sotqa jetkizbeı, sheship berdi. Mamandar jergilikti aýyl, aýdan ákimderimen birlesip, sý, jol sekildi máselelerdi sheshýge qatysty. Sondaı-aq turǵyndar nesıeniń merzimin uzartý, alıment óndirip alý, shaǵyn bıznes ashý sııaqty máselelermen júgingen», - dedi J. Úsipbekova.
Kelesi jyly «Salamatty Qazaqstan» poıyzy jolǵa shyǵa ma?
«Samruk-Kazyna Trust» áleýmettik jobalardy damytý qorynyń bas dırektory Alfııa Adıeva kelesi jyly da Densaýlyq saqtaý mınıstrliginiń qajettiligine qaraı, Qordyń osy mańyzdy jobany qarjylandyrý máselesin qarastyrýǵa daıyn ekenin aıtty. Al, DSM ókili Gúlnár Sársenbaeva kelesi jyly Densaýlyq saqtaý mınıstrligi atalǵan joba aıasynda yntymaqtastyqty jalǵastyrýdy josparlap otyrǵanyn jetkizdi.
«Aldaǵy jyly Densaýlyq saqtaý mınıstrligi osy joba aıasynda yntymaqtastyqty jalǵastyrýdy josparǵa engizdi. Sondaı-aq búgingi kúni «Aýyldyq densaýlyq saqtaýdy jańǵyrtý» ulttyq jobasy iske asyrylýda, onyń sheńberinde 2026 jylǵa deıin 655 alǵashqy medıtsınalyq-sanıtarııalyq kómek nysandaryn salý kózdelgen. Árıne, jyl saıyn aýyldyq densaýlyq saqtaý nysandarynyń ınfraqurylymy jaqsaryp keledi. Jańa nysandardy eskere otyryp, eldimekenderdiń kestesi men sany qaıta qaralyp jatyr», - dep túsindirdi G. Sársenbaeva.
