Sahna ádebin buzǵan ártister qandaı somada aıyppul tóleýi múmkin

ASTANA. QazAqparat – Qazaqstan ártisteriniń kórermen aldynda ózin ustaýyna qatysty talaptar qatańdaı túsedi. Bul týraly QR Mádenıet jáne sport mınıstrligi Mádenıet komıteti tóraǵasynyń orynbasary Kúmis Seıitova Ortalyq kommýnıkatsııalar qyzmeti alańynda ótken baspasóz máslıhatynda aıtty, dep habarlaıdy QazAqparat tilshisi.

«2020 jyly elimizdiń mádenıet salasy týraly zańyna ózgerister men tolyqtyrýlar engizildi. Oǵan sáıkes ártisterdiń kontsert jáne basqa da mádenı is-shara kezinde sahna ádebin saqtaýy týraly norma qarastyrylǵan, ıaǵnı kórermen aldynda ózin durys ustaı bilýi. Odan bólek, fonogrammaǵa qatysty talap qoıyldy. Ánshi fonogrammamen aıtqan jaǵdaıda kórermendi ol týraly eskertýi tıis. Biraq, qoldanystaǵy Ákimshilik quqyq buzýshylyq kodeksinde jazaǵa tartý nemese aıyppul salý qarastyrylmaǵan», - dedi Kúmis Seıitova.

Onyń aıtýynsha, zańnamaǵa ózgerister men tolyqtyrýlar engizý aýqymdy protsess.

«Búginde biz ártisterdiń sahna ádebin saqtaýy máselesin pysyqtap jatyrmyz. Atap aıtqanda, zańdy jáne jeke tulǵalar úshin 150 AEK-ten (477 000 teńge) bastap, 2 myń AEK-ke (6 360 000 teńge) deıin aıyppul salýdy qarastyryp otyrmyz. Biraq, bul shara qoldanysqa engizilgen joq, atalǵan protsedýrany qarastyryp jatyrmyz. Sondaı-aq bul máseleni ártisterdiń ózimen jáne kontsertterdi uıymdastyrýshylarmen birge talqyladyq. Olar qarsy emes, sondyqtan atalǵan ózgerister jaqyn arada engiziledi dep úmittenemiz», - deıdi ol.

Foto: mtsprout.nl