Saǵyntaev partııalyq baqylaýdy kúsheıtýdi tapsyrdy
Jıynda «Qutty meken» jobasyn júzege asyrýǵa, partııanyń Almaty qalalyq fılıaly bastaýysh partııa uıymdarynyń jumysyn qaıta qurýǵa, «Taza sessııa» aktsııasy aıasynda joǵary oqý oryndary arasynda júrgizilgen saýalnama qorytyndysyna qatysty máseleler qaraldy.
Sonymen qatar, partııanyń qalalyq fılıalynyń qoǵamdyq qabyldaýynda 2019 jyldyń 9 aıy ishinde memlekettik organdar basshylaryna azamattardyń joldaǵan ótinishteri jáne «Almaty-2020» qalany damytý baǵdarlamasy da aıtyldy.
«Partııalyq baqylaý barysynda «Qutty meken» jobasy boıynsha nysandarda ınjenerlik jáne áleýmettik ınfraqurylym salýdyń kesteden tys qalý faktileri anyqtaldy. Onyń sebebi – tehnıka men jumysshy kúshi jetispeıtin merdigerlerdiń jaýapsyzdyǵy», - dedi Saǵyntaev.
Sondaı-aq, Baqytjan Saǵyntaev aıtylǵan barlyq problemalardy joıý úshin naqtyly sharalardy iske asyrýdy tapsyrdy.
«Aýdandyq fılıaldardyń tóraǵalary – aýdan ákimderi bir aı ishinde kem degende bir ret partııalyq baqylaý komıssııalarynyń otyrystaryn ótkizip turýlary tıis. Partııanyń qalalyq fılıaly tóraǵasynyń birinshi orynbasary Stanıslav Kankýrov jobany júzege asyrý jáne tekserý qorytyndysy boıynsha oryn alǵan kemshilikterdi joıýǵa qatysty júrgizilgen jumystar boıynsha partııa fılıalynyń apparattyq jıynyna aqparat usynýy qajet,- dep qosty partııa jıynynda Saǵyntaev.
Almaty qalalyq fılıalynyń tóraǵasy, partııalyq jumys jetkiliksiz qamtylǵan jerlerdegi ýchaskelerde elektrondy karta negizinde «bastaýyshtardy» qurýdy, «Jas Otan» jastar qanatynyń qalalyq fılıalyna joǵary oqý oryndarynyń barlyq oqý korpýstary men jataqhanalarda «Senim jáshigi» jobasyn iske asyrýdy tapsyrdy.
