Saǵatyna 50 000 teńge: Túrkistanda memlekettik mekemede toı ótkizýge bolady
Túrkistanda memlekettik mekemede saǵatyna 50 000 teńge tólep toı ótkizýge bolady, dep habarlaıdy QazAqparat tilshisi.
Túrkistandaǵy «Kongress holl» kópfýnktsıonaldy keshenindegi zalda jeke adamdar toı ótkizip jatyr. Sondaı-aq memlekettik mekemede karaokede án aıtyp, bılıard oınaýǵa bolady.
Eki kún buryn Aıka Aıtahanova esimdi túrkistandyq belsendi áleýmettik jelide «Kongress holl» kesheni týraly jazba jarııalap, onda ótip jatqan toı men bılıard oınap jatqandardyń vıdeosyn jarııalady. Jazbaǵa túrli baǵytta pikir jazyp jatqandar kóp. Bir tarap «memlekettik mekemege toı jasaı beretin bolǵan ba?!» dep tańdanysyn bildirse, ekinshi taraptyń pikiri bos turǵan ǵımaratty jalǵa berip qarjy tabý kerek degenge saıady. Al «Kongress holl» kópfýnktsıonaldy keshen dırektory ne deıdi? Shyndyǵynda memlekettik mekemege jeke adamdar toı ótkizýine bola ma?
«2020 jyly «Kongress holl» kópfýnktsıonaldy kesheni qoldanysqa berildi. Aty aıtyp turǵyndaı, keshen kópfýnktsıonaldy. 1000 oryndyq kontsert ótkizetin zaldan bólek, túrli baǵyttarda jumys isteıtin múmkinshilikteri bar. Bı zaldary, dybys jazý stýdııasy, galereıa, balalardyń oıyn-saýyq ortalyǵy jumys isteıdi. Odan bólek, ǵımarattyń ishinde úlken zal ornalasqan. Jarǵymyz bekitilgen, memlekettik tirkeýden ótken. Sol jarǵynyń 3 baby, 8 tarmaǵynda «Qyzmettik ǵımarattardy jáne olarǵa jaqyn jatqan aýmaqty paıdalanýdy júzege asyrýdy, onyń ishinde olardy jalǵa berýge múmkinshiligi bar», - dep jazylǵan. ıAǵnı, «Kongress holl» kópsalaly kesheni – qazynaly kommýnaldyq kásiporyn. Sharýashylyq júrgizý quqyǵyna ıe. Sol sebepti biz qarajat tabýymyz qajet» - deıdi «Kongress holl» kópfýnktsıonaldy keshen dırektory Ǵalymjan Ernazarov.
Sondaı-aq mekeme basshysy keshendegi zaldy jalǵa alý quny 1 saǵatyna 50 000 teńge ekendigin aıtty. Jalǵa alýshy toı ótkize me álde ıntellektýaldy oıyn uıymdastyra ma, mańyzdy emes. Tek árbir saǵatyna 50 000 teńge tóleýi qajet.
«Aptasyna 2-3 ret toı bolady, 200 adamnan keledi, 300 mln-daı aqsha tabady» dep, jalǵan málimet tartýǵa bolmaıdy. Bizdiń negizgi bıýdjetimizdiń ózi 300 mln-ǵa jetpeıdi. Iá, meıramhana jumys isteıdi. Ol zańdy, zań júzinde jumys istep jatyrmyz dep bilemin. Bul tek toı úshin ǵana salynǵan ǵımarat emes. Munda kóptegen is-shara ótip jatyr. Basqarma tarapynan bekitilip bergen baǵa bar. Biz sol boıynsha jumys isteımiz» - dedi ol.
Sondaı-aq mekeme basshysy jelige jarııalanǵan keıbir vıdeolar 1 jyl buryn túsirilgenin málimdedi.
«Birinshi qabatta kishigirim meıramhana bolǵan. Oblystyq qarjy jáne memlekettik arhıvter basqarmasynyń ótkizgen konkýrsy arqyly jeke kásipker jalǵa alyp jumys atqarǵan. Degenmen mamyr aıynan bastap óz jumysyn toqtatty. Qazir oıyn-saýyq ortalyqtary, karaoke joq. Jelide kórsetilgen vıdeolar bir jyl burynǵy. Bılıard ústeline keler bolsaq, osyndaǵy ánshi jigit túzý jerge óz bılıard stolyn qoıyp, matasyn aýystyryp alýǵa orynbasaryma ótinish jasaǵan eken. Senbi kúni sol jumys atqarylǵan. Qazir túsiniktemelerin alyp, eskertý jasaldy. Aldaǵy ýaqytta mundaı jaǵdaı múldem bolmaıdy. Al, jalpy bılıard stoly mekemede qoıylmaǵan. Mekeme qyzmetkerlerine túski demalys kezderinde oınaýǵa tek ústel tennısi ǵana bar», - dedi mekeme basshysy.
