Sádibek Túgeldiń saılaýaldy shtaby Almatyda toǵyzqumalaqtan týrnır ótkizdi
Týrnırdiń basty maqsaty - ulttyq qundylyqtar qataryna jatatyn zııatkerlik oıyn túrine jas urpaqtyń yntasyn oıatyp, buqaralyq sport túrine aınaldyrý. Toǵyzqumalaqtan Almaty qalalyq federatsııasynyń prezıdenti Erkebulan Halelovtyń bul oıyn túrimen shuǵyldanyp kele jatqanyna 25 jyldan asypty.
«Qazaqstanda toǵyzqumalaq jaqsy damyǵan. Ol qazir 20-30 memleketke keńinen tarady. El komandasy óte joǵary jetistikterge jetip júr. Ózim bas bolyp Almaty qalasyndaǵy Arbatta byltyr jaz boıy toǵyzqumalaqty úırengisi keletinderge keshki 17-den bastap, kún batqansha tegin úırettik. Bul jas urpaqtyń oı-órisin damytýǵa arnalǵan oıyn túri bolǵandyqtan, tek resmı ǵana emes, buqaralyq sıpatqa ıe bolsa deımin», - deıdi Erkebulan Halelov.
Onyń sózinshe, ulttyq oıyn túrlerine erekshe kóńil bólip otyrǵan «Uly Dala qyrandary» RQB atynan prezıdenttikke kandıdat Sádibek Túgeldiń saılaýaldy baǵdarlamasynda ulttyq qundylyqtardy jas býyn boıyna darytyp, olardy ultjandylyqqa tárbıeleý máselesi jan-jaqty kóterilgen.
«Bul - ejelden kele jatqan ulttyq oıyn túri. Yqylym zamannan beri atadan balaǵa úzilmeı jalǵasyp kele jatqan toǵyzqumalaqty mektepterge arnaıy pán retinde engizse, onyń odan ári jandanatynyna senemin. Búgin Sádibek Túgel Almatyǵa kelip, týrnır uıymdastyryp, jastarǵa ulttyq zııatkerlik oıynymyzdyń mańyzyn uǵyndyryp bergendeı boldy. Ózim osy týrnırge arnaıy keldim»,- deıdi túrkitanýshy-ǵalym Raqymǵazy Qusaıynov.
Sádibek Túgel jarysqa qatysýshylarmen birge toǵyzqumalaq oınap, olardy jeńiske jigerlendirdi. Týrnırge qatysqan ál-Farabı atyndaǵy QazUÝ stýdentteri Sara Jetkergen, Arýjan Nartaı, Gúlbaný Madııar jáne Almaty halyqaralyq servıs jáne menedjment kolledjiniń stýdentteri Davıd Vasılenko, Áljan Jubanǵalıev , Almaty aqparat tehnıkalyq kolledjiniń stýdenti Danıl Zaharovtar úzdik oıyn úlgisin kórsetti.
