Sádibek Túgel Qaraǵandyda qýǵyn-súrgin qurbandarynyń rýhyna taǵzym etti

QARAǴANDY. QazAqparat - Prezıdenttikke úmitker Sádibek Túgel jáne onyń senimdi ókilderi qala ortalyǵyndaǵy XX ǵasyrdaǵy jazyqsyz jaza qurbandaryna arnalǵan eskertkishke baryp, gúl shoǵyn qoıdy. Bul jóninde kandıdattyń baspasóz qyzmeti habarlady.

«Bizdiń demografııamyzǵa zardabyn tıgizgen, «qyzyl qyrǵyn» atanǵan qoldan jasalǵan asharshylyq pen ultymyzdyń betine shyǵar qaımaǵyn qalqyp alǵan qýǵyn-súrgin jyldary urpaq jadynan umytylmaq emes. Alashorda ıdeıasynyń bastaýynda turǵan alash ardaqtylary Álıhan Bókeıhan, Álimhan Ermekov, Jaqyp Aqbaevtar - osy Qaraǵandy óńiriniń perzentteri. El azattyǵy úshin basyn báıgege tikken talaı ult zııalylary Karlagta otyryp, jazyqsyz japa shekti. Búgin - saıası qýǵyn-súrgin qurbandaryn eske alý kúni. Bolashaq urpaq mundaı qaıǵy-qasiret kórmesin, elimiz alǵa damyp, ulttyq qundylyqtardy boıyna sińirip ósken urpaq aǵa býynnyń el táýelsizdigi jolyndaǵy kúresi men qajyrly eńbegin esten shyǵarmaıdy dep senemin»,- dedi kandıdat Sádibek Túgel.

Onyń sózinshe, bes mıllıonǵa jýyq qýǵyn-súrgin qurbandary el aýmaǵyndaǵy ALJIR, Steplag, Karlag sekildi lagerlerge jazyqsyz qamalǵan.

Eske sala keteıik, Qazaqstanda kezekten tys prezıdent saılaýy 9 maýsymǵa belgilengen. Oǵan kandıdet retinde 7 úmitker tirkeldi.