Sádibek Túgel Býrabaıdaǵy Kenesary úńgirine bardy

NUR-SULTAN. QazAqparat - QR Prezıdenttigine úmitker Sádibek Túgel Aqmola oblysynyń Býrabaı aýdanynda ornalasqan «Kenesary úńgirine» arnaıy bardy. Bul týraly kandıdattyń baspasóz qyzmeti habarlady.

«Kenesary han - qazaq tarıhynda sońǵy han ǵana emes, ult azattyǵy jolynda qaıtpas qaısarlyǵy men órshil rýhymen halyq júreginen oıyp oryn alǵan tulǵa. Myna úńgirden aınala alaqandaǵydaı kórinip tur. Jergilikti kónekóz qarııalardan bizge jetken áńgimelerde otarlaý saıasatyna qarsy shyqqan batyr senimdi serikterimen osynda jınalyp, aldaǵy áskerı mańyzdy josparlaryn aıtyp aqyldasqan eken. Kenesarydaı ataqty, erligi - ańyz, órligi - ónege bolǵan hannyń úńgirine sizderdi alyp kelip, aldaǵy mańyzdy kezeńniń aldynda batyrdyń rýhyna bas ıip, quran baǵyshtasaq dep oılap edim» ,- dedi Sádibek Túgel ózimen birge júrgen saılaýaldy shtabyndaǵy senimdi ókilderine.

«Ult táýelsizdigi jolynda basyn báıgege tikken, san ret ózgelerdiń qazaq jerine salǵan bekinisin talqandap, jaýdan beti qaıtpaǵan Han Keneniń óshpes órligi men el ańyz etip aıtar erligi aldynda bas ııý - Sádibek Túgeldiń de ómirlik ustanymy men azamattyq kózqarasyn aıqyndap turǵandaı» dep habarlady kandıdattyń baspasóz qyzmeti.