S. Sartaev: Konstıtýtsııa - zaıyrly memlekettiń aınasy

ALMATY. QazAqparat - Konstıtýtsııa - kez kelgen zaıyrly memlekettiń aınasy, turaqtylyqtyń tiregi. Búgin Almatyda Konstıtýtsııa kúni qarsańynda QR Ulttyq kitaphanasy oqymandarymen kezdesý barysynda Qazaqstanǵa belgili zańger, akademık, zań ǵylymdarynyń doktory, Ata zańnyń qabyldanýyna zor úles qosqan ǵalym Sultan Sartaev osylaı dedi.

«Konstıtýtsııa - kez kelgen memlekettiń aınasy, saıası turaqtylyǵynyń tiregi. Bizdiń Prezıdentimiz Nursultan Nazarbaev Konstıtýtsııa aýmaǵynda qalaı ómir súrý kerektigin jurtshylyqqa shynaıy túrde kórsetip keledi. Bul búginde óz jemisin berýde. Ult kóshbasshymyz alysty boljaıtyn kóregen saıasatker», - dedi S. Sartaev.

Sonymen qatar, zańger ǵalym Ata zańdy qabyldar aldynda uzaq talqylaýlar bolǵanyn jetkizdi.

«Qazaqstannyń Konstıtýtsııasy kezinde referendým negizinde qabyldandy. Saılaýshylardyń 90 paıyzy ony qoldady. Onyń aldynda talaı talqylaýlar, qyzý pikirtalastar boldy. Basqa elderdiń konstıtýtsııalary qaraldy. Bul árıne óz nátıjesin berdi. Osyndaı qajyrly jumystardyń arqasynda halyqtyń talap-tilegine saı tarıhı qujat qabyldandy. Sondyqtan da ony halyq Ata zań dep ataıdy. Biz qashanda sol Ata zańnyń aýmaǵynda ómir súrýimiz kerek. Áıtpese turaqsyzdyq oryn alýy ǵajap emes. Oǵan basqa memleketterde bolyp jatqan oqıǵalar kýá», - dedi S. Sartaev.