Rıýtte: NATO-nyń áskerı shyǵyndary 10 jylda bir trıllıon dollarǵa ósti

ASTANA. KAZINFORM – AQSh prezıdenti Donald Tramptyń yqpalymen bul shyǵyn aldaǵy ýaqytta taǵy birneshe trıllıon dollarǵa artady. Bul týraly NATO Bas hatshysy Mark Rıýtte málimdedi, dep habarlaıdy TASS.

Gaagada ótken NATO sammıti qatysýshylaryna arnalǵan saltanatty qabyldaýda sóılegen Rıýtte alıanstyń sońǵy 10 jyl ishindegi áskerı shyǵyndaryna toqtaldy.

– Sońǵy onjyldyqta NATO-nyń áskerı shyǵyndary bir trıllıon dollarǵa artty. Bul sizdiń arqańyzda, prezıdent Tramp. Siz bizdi alǵa jeteledińiz. Endi bul shyǵyndar taǵy birneshe trıllıon dollarǵa kóbeımek, – dedi ol.

Rıýtteniń aıtýynsha, bul ósim alıanstyń qorǵanys shyǵyndary boıynsha qazirgi 2% kórsetkishin 2035 jylǵa qaraı ІJÓ-niń 5%-na deıin jetkizý josparyna baılanysty bolmaq. Bul sheshim 25 maýsymda Gaagada ótetin sammıtte qabyldanady dep kútilýde.

NATO kóshbasshylarynyń negizgi kezdesýi 25 maýsym kúni ótedi. Úsh saǵatqa josparlanǵan plenarlyq otyrysta 32 qatysýshy eldiń árqaısysyna shamamen 5,5 mınýttan sóz beriledi.

Alaıda Rıýtteniń aldyn ala aıtýynsha, bul joly áskerı shyǵyndar týraly eshqandaı naqty pikirtalas bolmaıdy. Sebebi qorytyndy málimdeme dúısenbi kúni-aq kelisilip qoıǵan. Sammıtte el basshylary tek oǵan qol qoıyp, qysqasha saıası málimdemeler jasaıdy.

Buǵan deıin NATO elderi qorǵanys shyǵyndaryn JІÓ-niń 5%-yna deıin ulǵaıtýǵa keliskenin jazdyq.