Rýstam Júrsinov: Kvazımemlekettik kompanııalar qarapaıym kásipkerlerdi qanap otyr
«Kvazımemlekettik kompanııalarmen jasalatyn kelisimderdiń sharttary kásipkerlerdi qanaýǵa baǵyttalǵan. Mysaly, tapsyrys berýshi jobanyń oryndylyǵyna kúmán keltirý jeleýimen kelisimsharttan birjaqty negizdi bas tarta alady. Al, áýelgi ýaǵdaǵa sengen jetkizýshi ınvestıtsııa salyp, shyǵyn kóredi. Ol shyǵyndy kvazımemlekettik kompanııa tóleýden bas tartady. Al eger, jetkizýshi kásipker sharttan bas tartsa, aıyppul salynyp, shyǵyndardy óteýge mindetteıdi. Onymen qoımaı, josyqsyz jetkizýshilerdiń qara tizimine qosady», - dedi ýákil.
Onyń aıtýynsha, kvazımemlekettik kompanııalar aqshanyń joqtyǵyn alǵa tartyp, tıisti tólem jasamaı qoıǵan jaǵdaılar da bar.
«Sonda kvazımemlekettik kompanııalar bıýdjetin josparsyz ıgere me? Bizdegi 7 myń kvazımemlekettik kompanııa eldiń jalpy ishkióniminiń 50%-dan astamyn alyp otyr. Jeke bıznes olardyń talaptaryna beıimdelýge májbúr.
Men «Samuryq», «Báıterek» holdıngteriniń enshilis uıymdaryna, áleýmettik kásipkerlik korporatsııalarǵa jáne ózge de kompanııalarǵa qatysty aıtyp otyrmyn. Qazir óńirlerde prokýratýra organdary túrli máselelerge taldaý júrgizip jatyr. Soǵan kvazımemlekettik sektordyń kásipkerlerdi qanaýǵa baǵyttalǵan sharttary týraly máseleni de engizýdi usynamyz», - dedi Rýstam Júrsinov.
