Rýslan Berdenov jaqynda aýrýhanadan shyǵatynyn aıtty
ShYMKENT. KAZINFORM-Shymkent qalasy ákiminiń orynbasary Rýslan Berdenov áleýmettik jelide jazba qaldyrdy.
Qastandyq jasalyp, oq tıgen Rýslan Berdenov qazirgi jaǵdaıyn baıandady. Sondaı-aq, qıyn sátte qoldaý bildirgen kópshilikke alǵys aıtty.
- Meniń basyma túsken aýyr jaǵdaıdan kópshiligińiz habardarsyzdar dep bilemin. Bul oqys oqıǵa maǵan da, meniń otbasym men jaqyndaryma da aýyr tıgeni anyq. Muny sózben aıtyp jetkizý óte qıyn. Alaıda synaqqa toly bolǵan osy ýaqyt aralyǵynda kóptegen adamdardyń, áriptesterimniń, tamyr-tanystarymnyń janashyrlyǵyn, qoldaýyn, tilektestigin sezindim. Telefonyma túsken qońyraýlar, habarlamalar, áleýmettik jelidegi tileýles jazbalar kóńilime demeý bolǵanyn, kúsh-qýat bergenin, sergitkenin aıtqym keledi, - dep jazdy ol.
Sondaı-aq, Rýslan Berdenov 3 aptaǵa sozylǵan aýrýhanadaǵy kúnderi aıaqtalyp, kúndelikti tirshilikke oralatyn sát taıap qalǵanyn jetkizdi.
- Álbette, birinshi Allanyń, sodan soń dárigerlerimizdiń jiti baqylaýynyń, em-domynyń arqasynda densaýlyǵym ońaldy, qalpyna keldi. Osy ýaqyt ishinde men elimizdiń medıtsınasy kóp ilgerilegenine, sheteldik klınıkalardan esh kem emestigine kóz jetkizdim. Aq halatty abzal jandarymyzdyń meıirimi men kásibıligi de rızashylyǵymyzǵa ábden laıyq. Barshańyzdyń qoldaýyńyz ben janashyrlyqtaryńyzǵa sheksiz alǵysymdy aıtamyn, - dep jazdy ol.
Aıta keteıik, budan buryn Shymkentte qala ákiminiń orynbasary Rýslan Berdenovke qastandyq jasalǵan bolatyn. Kúdikti sheneýnikke qaraı úsh ret oq atqan. Oqıǵa saldarynan ákimdik qyzmetkeri jaraqat alyp, aýrýhanaǵa jetkizildi.
Al dárigerler Rýslan Berdenovtyń ómirine qaýip tónip turmaǵanyn aıtty. Jasalǵan ota da sátti ótti.