Rýmynııada prezıdent qaıta saılanatyn kún belgili boldy

ASTANA. KAZINFORM – Jeksenbi, 4 mamyrda Rýmynııada prezıdent saılaýynyń birinshi kezeńi ótedi, dep habarlaıdy Euronews. 

Memleket basshysy laýazymyna 11 kandıdat talasyp otyr. Saýalnamalarǵa sáıkes, bul saılaýda favorıt – ásireońshyl kandıdat, «Rýmyndardy biriktirý alıansynyń» jetekshisi Djordje Sımıon.

Onyń basty básekelesteri – úsh rýmyn saıasatkeri: Býharest meri Nıkýshor Dan, úkimettik koalıtsııanyń biryńǵaı kandıdaty Krın Antoneský jáne eldiń burynǵy premer-mınıstri Vıktor Ponta. 

Euronews atap ótkendeı, «Rýmynııany qutqarý odaǵy» oppozıtsııalyq partııasynyń jetekshisi Elena Laskonıdiń de múmkindigi az emes. 

Saılaý aldyndaǵy zertteýlerdiń birine sáıkes, saılaý qarsańynda ótkizilgen teledebat rýmyn saılaýshylaryna aıtarlyqtaı áser etken. 

-  Áleýmettik jeli aqparat úshin de, jalǵan aqparat úshin de mańyzdy ról atqaratyny anyq.

Keıbir úmitkerler olardy basqasha paıdalanady. Bireýler dástúrli BAQ-ty kóbirek paıdalansa, endi bireýler jappaı áleýmettik jelilerge júginedi. Djordje Sımıon, árıne, onlaın naýqanǵa súıenedi, biraq bul ásire ońshyl kóshbasshylardyń ortaq qasıeti, - dedi saıasattanýshy Krıstıan Pyrvýleský Euronews-ke. 

Rýmynııa azamattary jańa memleket basshysyn ótken jyldyń sońynda saılaýy tıis edi.

Alaıda Konstıtýtsııalyq sot sheteldikterdiń saılaý protsesine aralasýy múmkin degen kúdikpen saılaý qorytyndylaryn joqqa shyǵaryp, birinshi týrda jeńiske jetken Kelın Djorjeskýǵa saılaýǵa qatysýǵa tyıym saldy.

Eske sala ketsek, 2025 jyldyń aqpan aıynda Rýmynııa prezıdenti Klaýs Iohannıs otstavkaǵa ketetinin jarııalady.