«Rýhanı jańǵyrý»: halyqtyń jas erekshelikterine saı jobalar ázirlenedi

NUR-SULTAN. QazAqparat – «Rýhanı jańǵyrý» baǵdarlamasy aıasynda halyqtyń jas erekshelikterine saı arnaıy jobalar ázirlenedi. Bul týraly halyqqa esep berý kezdesýinde QR Aqparat jáne qoǵamdyq damý mınıstri Aıda Balaeva aıtty, dep habarlaıdy QazAqparat tilshisi.

«Mınıstrliktiń quzyryndaǵy taǵy bir mańyzdy ıdeologııalyq baǵyt – qoǵamdyq sanany jańǵyrtý salasy. Árıne, rýhanııat baǵytyndaǵy jumystyń nátıjesi birden kórinbeıtini belgili. Onyń ishinde qoǵamdyq sanany jańǵyrtý – úlken eńbekti, uzaq merzimdi talap etedi. Degenmen, qol jetkizgen nátıjeler joq emes. Tuńǵysh Prezıdent – Elbasymyzdyń tarıhı maqalasynan bastaý alǵan baǵdarlama boıynsha búginde 17 arnaıy joba júzege asyp jatyr. Jyl basynan beri 3 mıllıonnan astam halyqty qamtyǵan 13 myńnan artyq is-shara ótkizildi», - dedi Aıda Balaeva.

Onyń atap ótýinshe, ár jobanyń óz orny men aýdıtorııasy bar. Degenmen olardyń arasynda «Týǵan jer», «100 jańa esim», «Kıeli Qazaqstan», «100 jańa oqýlyq» «Eńbek – eldiń muraty», «Únem – qoǵam qýaty» jobalaryn erekshe ataýǵa bolady.

«Baǵdarlamanyń basty maqsaty – jańa sapadaǵy qoǵamdyq sana qalyptastyrý. Bul rette, bıyldan bastap «Rýhanı jańǵyrý» baǵdarlamasyn – Ulttyq jańǵyrý kezeńine ótkizý qolǵa alyndy. Baǵdarlamany halyqtyń jas erekshelikterine saı toptap, ár maqsatty topqa – arnaıy jobalar ázirlenedi. Onyń ishinde, ásirese mektepke deıingi jáne mektep jasyndaǵy býynǵa basty kóńil bólinetin bolady»,- dedi mınıstr.