«Rýhanı jańǵyrý» baǵdarlamasyna úlken ıdeıalyq tuǵyrnama dep qaraǵan jón - Bolat Tilepov

NUR-SULTAN. QazAqparat - «Rýhanı jańǵyrý» baǵdarlamasyna únemi damyp otyratyn úlken ıdeıalyq tuǵyrnama dep qaraǵan jón. Bul týraly QR Aqparat jáne qoǵamdyq damý vıtse-mınıstri Bolat Tilepov aıtty, dep habarlaıdy QazAqparat tilshisi.

«Osydan úsh jyl buryn elimizdiń ıdeologııalyq qazanyn toltyrýǵa úmit syılaǵan úlken bastama qolǵa alynǵan bolatyn. «Rýhanı jańǵyrý» degen atpen bastalǵan baǵdarlama bıyl mine ,jańa kezeńge aıaq basyp otyr. Árıne, ulttyq rýhtyń qaıta túleýi elimizde búgin bastalǵan joq», - dedi ol Ortalyq kommýnıkatsııalar qyzmetindegi baspasóz máslıhaty barysynda.

Onyń dereginshe, buǵan deıin 2004 jyly «Mádenı mura», 2010 jyly «Halyq tarıh tolqynda» degen baǵdarlamalar boldy. Olar óziniń negizgi mıssııasyn oıdaǵydaı oryndap, halqymyzdyń tarıhı, mádenı mırasyn qaıta jańǵyrtty.

«Al, endi, búgingi rýhanı jańǵyrýdyń basty maqsaty - bul qoǵamdyq sana. Al basty sharty - ulttyq kodty saqtaý. Kórip-bilip otyrsyzdar, álem kún saıyn ózgerip jatyr. Aıtyp kelmegen indettiń ózi adamdardyń ómir saltyn ǵana emes, tutastaı memleketterdiń saıasatyn ózgertýde. Birinshi kezekke qazirgi tańda eldiń densaýlyǵy, tán saýlyǵy ǵana emes, jan saýlyǵy, ıaǵnı rýhanı kúshi, saýaty men tálim-tárbıesi shyǵyp otyr. Munyń barlyǵy bir kúnde ne bir jylda bola salatyn dúnıe emes. Óıtkeni, adamnyń tánin emdeý qıyn bolsa, al janyn emdeý qıynnyń qıyny. Sondyqtan qoǵamnyń rýhanı jańǵyrý máselesine belgili bir merzimdi baǵdarlama emes, únemi damyp, tolyqtyrylyp otyratyn úlken ıdeıalyq tuǵyrnama dep qaraǵan jón», - dedi Bolat Tilepov.