«Rýhanı alaıaqtar»: Aıdos Sarym ezoterıkter men trener-koýchterdi synǵa aldy

ASTANA. KAZINFORM – Májilis depýtaty Aıdos Sarym Mádenıet jáne aqparat mınıstri Aıda Balaevaǵa saýal joldady.

Depýtat sońǵy ýaqytta elde keńinen taralyp ketken ezoterıkalyq, psevdopsıhologııalyq jalǵan ilimder men sektalardyń ásire belsendiligi qatty alańdatyp otyrǵanyn jetkizdi.

Onyń aıtýynsha, jalǵan dıplom jasatyp, ataǵy jer jaratyn «akademııalardyń», álemdik «uıymdardyń» atynan sóz sóılep júrgen baqsy-qushnashtyń, trener-koýchterdiń sharalarynyń sany kún sanap artyp keledi.

– Qaı bir saıtty, áleýmettik jelini ashyp qalsań, álemniń barsha qupııasyn meńgergen, adamnyń jan dúnıesiniń búkil kiltin beline baılaǵan mamansymaqtar kópshilikpen kezdesýler, kýrstar, semınarlar ótkizip jatady. Ókinishtisi, buny jekelegen adamdardyń óz tańdaýy, jeke quqyǵy dep te aıta almaımyz. Rýhanı alaıaqtar memleketettik mekemelerge, kvazımemlekettik sektordaǵy uıymdarǵa deıin jetip, memlekettik, qoǵamdyq problemaǵa aınalǵanyn baıqap otyrmyz, – dedi A.Sarym Májilistiń jalpy otyrysynda.

Depýtat «Sıýtsaı» dep atalatyn kýrstardy mysalǵa keltirdi.

– Bul baǵyt «adamnyń ishki áleýetin ashatyn sandyq psıhologııa» dep tanystyrylǵanymen, is júzinde ǵylymı negizi joq, ezoterıkalyq jáne dinı sıpattaǵy kommertsııalyq jobaǵa aınalyp otyr. Búginde «Sıýtsaı» ataýyn jamylǵan toptar jabyq formattaǵy sharalar ótkizip, óz ýaǵyzdaryn keńinen taratyp júr. Olardyń basym bóligi – lıtsenzııasyz, sertıfıkatsyz, tirkelmegen tulǵalar. Jalǵan ilimniń basty maqsaty – azamattardy «rýhanı damý» uranymen ılandyryp, sandar men sımvoldarǵa súıengen psevdoteorııa arqyly materıaldyq paıda tabý. Nátıjesinde kóptegen adam, ásirese áıelder men jastar, qarjylaı shyǵynǵa ushyrap, psıhologııalyq táýeldilikke túsýde, al keıbiri otbasylyq jáne áleýmettik kúızeliske tap bolyp otyr, – dep tolyqtyrdy depýtat.

Májilis depýtaty bul úrdisti «rýhanı indet» nemese «mentaldyq epıdemııa» dep atady.

– Memlekettik organdar mundaı uıymdardyń qyzmetine monıtorıng jasap otyr ma? Osyndaı uıymdar men koých-trenerler tarapynan jastarymyzǵa, áıelderge jáne ózge áleýmettik toptarǵa keltirilip jatqan psıhologııalyq, materıaldyq jáne basqa da zııandardy júıeli túrde zertteıtin tásilder men saraptamalar bar ma? Memorgandar bul destrýktıvti qyzmetke qatysty zańnamalyq nemese normatıvtik deńgeıde shara qabyldaýdy josparlap otyr ma? Halyq arasynda BAQ arqyly aqparattyq-túsindirý jumystary júrgizile me? Mundaı jumysty júzege asyrý úshin qajetti ǵylymı, kadrlyq áleýet pen quraldar bar ma? – dep saýal qoıdy A.Sarym.

Aıta keteıik, byltyr Qazaqstan azamattarynan koých qyzmetine 900-ge jýyq shaǵym túsken.