Rýdnyıda 50 otbasy baspanaly boldy

QOSTANAI.QazAqparat – Táýelsizdik merekesi qarsańynda Rýdnyı qalasynyń 50 turǵyny «Nurly jer» baǵdarlamasy aıasynda baspanaly boldy, dep habarlaıdy QazAqparat. «Vostochnaıa» yqshamaýdanyndaǵy jańa páterlerdiń kiltin oblys ákimi Arhımed Muhambetov tapsyrdy.

Bes qabatty turǵyn úıdiń jalpy aýdany 3900 sharshy metrdi quraıdy. Onyń qurylysyna respýblıkalyq jáne jergilikti bıýdjetten 442,6 mln teńge jumsalǵan. Bas merdiger – «Rýdnyısokolovqurylys» AQ. «Aımaqta turǵyn úı qurylysy qarqyndy damyp kele jatqanyna kýá bolyp otyrsyzdar. Aýqymdy jumystyń basty maqsaty - azamattardy qoljetimdi úımen qamtamasyz etý. Bıyldyń ózinde oblys boıynsha 330 myń sharshy metr turǵyn úı paıdalanýǵa berildi. Bul ótken jylǵy kórsetkishten 10 paıyzǵa joǵary. Rýdnyıǵa kelsek, osy yqshamaýdanda jýyrda eki arendalyq turǵyn úı boı kótergen edi. Bolashaqta 60 páterlik taǵy tórt jańa úı turǵyzý josparda bar», – dedi óńir basshysy qýanysh ıelerin quttyqtap. Saltanatty sharadan soń Arhımed Muhambetov Ediresovter otbasynyń jańa páterinde qonaqta bolyp, syılyq tapsyrdy.