Rýdnyı turǵyny «1000 volonter» jobasyn qolǵa aldy
– Marııa ıÝrevna, volonterlerdiń jolyna qalaı keldińiz?
– Eriktilik mansabym mektep qabyrǵasynda bastaldy. 16 jasymda Rýdnyıdaǵy kolledjdiń stýdenttik keńesi tóraǵasy atandym. Sol kezden bastap volonterler uıymyn ashýdy josparladym. Kóp uzamaı eriktiler shtaby paıda boldy. Oqý ornyn aıaqtaǵan soń Rýdnyı qalasy Jastar resýrstyq ortalyǵyna jastar praktıkasy boıynsha qabyldandym. Munda da meni «Alǵa qadam» volonterler qozǵalysynyń jetekshiligine jiberdi. Bir jarym jyldyń ishinde bizdiń shtab keńeıip, tyń josparlardy dúnıege ákeldi.
– Qandaı jobalardy atap ótesiz? «1000 volonter» ıdeıasy qaıdan týyndady?
– Rýdnyı qalasynda 130 myń adam turady. Onyń 29 myńy – jastar. Sol sebepti osy zamandastarymyzdy biriktirip, paıdaly ispen aınalasýdy oıladyq. Bastapqyda 1000 eriktiniń basyn qosýdy maqsat ettim. Sóıtip, «Volonter» degen jazýy bar 1000 qolmonshaq jasattyq. Bizdiń jobaǵa nıet etken ár qatysýshyǵa osy qolmonshaqty beremiz. Olar volonter atanyp, mádenı-buqaralyq is-sharalarǵa belsendi qatysa alady. Taǵy bir joba «Levelup» dep atalady. Bul bilim salasyna qatysty. Eriktilerdi iriktep alyp, áleýmettik jobalar boıynsha oqytamyz. Qazirdiń ózinde «Levelup» arqyly bilim alǵandar 20 áleýmettik jobanyń avtory atanyp otyr. Jalpy bizdiń «Alǵa qadam» eriktiler shtabynyń qurylǵanyna bir jyldan asty. Biraq osy ýaqyt ishinde 10 adamnan bastalǵan topqa 300-deı jas jınaldy. Barlyǵynyń nıeti bir – basqalarǵa kómektesý. Byltyr 40-tan astam is-shara ótkizdik, onyń ishinde «Jaqsylyq jasa», «Densaýlyq kúni», «Rýdnyı-marafony» aktsııalaryn atap ótýge bolady. Jalǵyzbasty, qart adamdarǵa nazar aýdaryp, qamqorlyq kórsetip kelemiz. Qalany abattandyrýǵa da kóp ýaqyt bólinedi. Eriktiler shtabyna ártúrli jastaǵy adam qatysa alady. Árkimge esigimiz ashyq.
Biz ár adamǵa qýanysh syılaýdy mindetimizge aldyq. Máselen, byltyr Rýdnyı qalalyq aýrýhanasynyń balalar bólimshesine bardyq. Bir túsingenimiz – aýrýhanada jatqan balalarǵa tek qana dári-dármek qajet emes. Buǵan sol kezde kóz jetkizdik. Balalar úshin salaýatty ómir salty týraly oıyn-saýyq baǵdarlamasyn daıyndap apardyq. Oıyn ózimiz qurǵan «Shildren» jobasy sheńberinde iske asty. Balalarǵa aýrýhanada qalaı durys tamaqtanýdy túsindirdik, dárýmender, zııan jáne paıdaly azyq-túlikter týraly aıtyp berdik. «Qoltyraýyn», «Paıdaly – paıdasyz», «Dárýmenderdi bilip júr» atty zııatkerlik oıyndary oınatyldy. Qyzyq bolǵany sonshalyq. aýrýhananyń basqa da emdelýshileri, medıtsına qyzmetkerleri de qosylyp oınady. Bul bir ǵana mysal. Munyń syrtynda balalar úıi, ınternattyń tárbıelenýshilerine de bardyq. Týberkýlezge qarsy shıpajaıdyń jas emdelýshilerine saýyq-saıran marafondaryn uıymdastyrdyq.
– Byltyr Rýdnyıda jastar arasynda temekige qarsy aktsııa bastadyńyzdar. Bul qanshalyqty jemisti boldy?
– Eriktilerdiń mindeti – aqyl aıtý emes, qoǵamǵa paıdaly isterge shaqyrý. Al ony qoldaý-qoldamaý ár adamnyń óz erkinde. Mine, eriktiliktiń bir mańyzdy tetigi osy. Iá, byltyr Rýdnyıda «Nıkotın emes, vıtamın» atty aktsııa uıymdastyrdyq. Rýdnyı qalasy polıtsııa basqarmasynyń qoǵamdyq kómekshileri jastar resýrstyq ortalyǵymen birlesip, kóshe araladyq. Ondaǵy maqsatymyz qoǵamdyq oryndarda, avtobýs ishinde adamdardyń bir tal temekisin bir almaǵa almastyrý edi. Kádimgi almany ókpe aýrýlarynyń órshýine qarsy paıdalanýǵa bolady. Ǵalymdar apta ishinde eki almanyń ózi kómektesetinin dáleldedi. Ásirese, bul jemistiń kók tústisi shylymqorlardyń zııandy ádetten arylýyna kómektesedi. Aktsııaǵa kezdeısoq júzbe-júz jolyqqan 30 shaqty adam qatysty. Árıne, muny árkim ártúrli qabyldady. Áldebireýi bir alma úshin bir tal temekiden bas tartýǵa qarsylyq bildirgen joq, al endi biri shylym qorabyn qoqysqa tastady.
– Osy baǵyttaǵy jumystaryńyzdy oblys basshylyǵy elep-eskerip, sizdi «altyn» jastardyń tizimine engizdi ǵoı?
– Bul da bir beles. Volonterlik salasyna qosqan úlesim úshin Qostanaı oblysy jastarynyń 2019 jylǵy Altyn kitabynyń laýreaty atandym. Keıin respýblıkalyq «Jomart júrek» baıqaýynda «Eren eriktilik» nomınatsııasyn ıelendim. Áldekimnen marapat alaıyn dep istep jatqan joqpyz. Degenmen eńbegińniń baǵalanǵany kóńil qýantady.
