Rýdnyı qalasynyń jylý jelilerin qaıta jańartýǵa 4 mlrd teńge bólindi
Albert Raý Rýdnyı qalasynda 2023-2027 jyldarǵa arnalǵan «Halyqpen birge!» saılaýaldy baǵdarlamasyn oryndaý jónindegi Jol kartasynyń júzege asyrylý barysyn tekserdi, dep habarlaıdy QazAqparat AMANAT partııasynyń resmı saıtyna silteme jasap.
«Rýdnyıdyń jylý jelilerin jańǵyrtý jumysyna arnalǵan alǵashqy 4 mlrd teńgeni bólip qoıdyq. Jumys júrip jatyr. Arnaıy kelip, soǵan kóz jetkizdim. Bul jumys aldaǵy jyly da jalǵasyp, taǵy 4 mıllıard teńgeden astam qarajat bólinedi. Bıýdjetti qyrkúıek-qazan aılarynda qarastyramyz. Aldaǵy eki-úsh jyldyń jospary ázirlendi. Onyń ishinde, Qashar kentin sýmen jabdyqtaý jáne birqatar oramishilik jelilerdi jańǵyrtý jumysy da bar», – dedi Albert Raý.
Halyq qalaýlysy Rýdnyıda kommýnaldyq sharýashylyq qyzmeti mamandarynyń jetispeýshiligi baıqalatynyn atap ótti. Buǵan jalaqynyń azdyǵy da sebep bolyp otyr. Budan soń, Albert Raý páter ıeleriniń tutyný kooperatıvteri (PITK) jáne PIK tóraǵalarymen kezdesip, PIK qyzmetin jetildirýge qatysty «Turǵyn úı qatynastary týraly» zań jobasyn talqylady.
«Men bul zańdy turǵyn úı qatynastary týraly emes, adamdar arasyndaǵy, kórshiler arasyndaǵy adamı qarym-qatynas dep atadym. Reformaǵa nebári jarty jyl ýaqyt bólý týraly sheshim qabyldaǵan kezde, men qarsy boldym. Sebebi tutas sanany ózgertý úshin belgili bir ýaqyt qajet. Soǵan qaramastan, osyndaı merzim berildi. Nátıjesinde azamattardyń 10%-y ǵana belsendilik tanytty. Biz birqatar túzetý ázirlep jatyrmyz. Sebebi PITK men PIK qyzmeti jetildirgen jaǵdaıda ǵana turǵyndardyń múddesi eskeriledi. Bul eń aldymen esep berýdiń ashyqtyǵyna, basqarý organdaryn saılaýǵa qatysty bolmaq. Bárin ashyq ári ádil jasaý kerek: ár úıge jınaq shotyn ashyp, únemi esep berip otyrý qajet. Qys boıy qarjy jınap, kóktemde jóndeý jumysyn júrgizýge bolady. Eger adam qarajatynyń qaıda jumsalyp jatqanyn biletin bolsa, páterge ıesi ekenin de sezine bastaıdy. Nátıjesinde tıisti qarym-qatynas paıda bolady», – dedi ol.
Aıta keteıik, aldaǵy 5 jylda partııanyń «Halyqpen birge!» saılaýaldy baǵdarlamasyna sáıkes, el aýmaǵyndaǵy TKSh ınfraqurylymyn aýqymdy jańǵyrtý kózdelgen. Qostanaı oblysyndaǵy Qostanaı, Lısakovsk, Arqalyq jáne Jitiqara qalalarynda jylýmen jabdyqtaý jelileriniń 100 shaqyrymyn kúrdeli, aǵymdaǵy jóndeý jáne jańǵyrtý jumysy josparlanýda. Sondaı-aq, Arqalyqta elektrmen jabdyqtaýǵa jelisiniń 40 shaqyrymyna kúrdeli jóndeý júrgiziledi.
