Rýdnyıdyń burynǵy prokýrory 4,5 jylǵa bas bostandyǵynan aıyryldy
QOSTANAI. KAZINFORM – Qostanaıda Rýdnyı qalasynyń burynǵy prokýrory Murat Ospanovqa qatysty sot úkimi jarııalandy. Ol para alǵany úshin kináli dep tanyldy.
Qostanaı qalasynyń №2 sotynda iri mólsherde para alýǵa oqtalǵany úshin (QK 24-baby 3-bóligi, 366-baby 3-bóliginiń 3) tarmaǵy) aıyptalǵan Murat Ospanovqa qatysty qylmystyq is qysqartylǵan tártipte qaraldy.
Sot anyqtaǵandaı, 2025 jyldyń qańtarynan qyrkúıegine deıin Rýdnyı qalasynyń prokýrorynyń bastamasymen qala qurylys bóliminde revızııalyq komıssııa anyqtaǵan negizsiz eńbekaqy tóleý faktisi boıynsha tekseris júrgizilgen.
Osy kezeńde sottalýshy iri mólsherde para alýǵa qylmystyq nıetpen barǵan. Ol memlekettik mekemeniń basshysynyń mindetin atqarýshydan tekseristi toqtatý jáne qylmystyq qýdalaýdan bosatý úshin 20 mln teńge kóleminde para túrinde aqsha berýdi jeke ózi talap etken.
Sottalýshy quqyq qorǵaý organdarynyń qyzmetkerleri tarapynan aqsha alý kezinde ustalǵan.
Sottalýshyny 20 mln 100 myń teńge mólsherinde aqsha qarajatyn alý kezinde quqyq qorǵaý organdarynyń qyzmetkerleri ustady. Para sommasynyń bir bóligi (8 mıllıon 100 myń teńge) mýlıaj bolǵan.
Taraptardyń ustanymy:
Sot jaryssózinde memlekettik aıyptaýshy sottalýshyǵa 4 jyl 6 aı bas bostandyǵynan aıyrý jazasyn taǵaıyndaýdy surady.
Sottalýshy men onyń qorǵaýshylary aıyppul túrindegi jaza qoldanýdy ótindi.
QK-niń 366-baby 3-bóliginiń sanktsııasynda negizgi jaza retinde paranyń 60 eselengennen 70 eselengenge deıingi mólsherinde aıyppul salý nemese 7 jyldan 12 jylǵa deıin bas bostandyǵynan aıyrý kózdelgen.
Para somasynyń bóligi uqsastyrylǵan aqsha bolǵandyqtan Qazaqstan Joǵarǵy Sotynyń «Keıbir sybaılas jemqorlyq qylmystaryn qaraý praktıkasy týraly» normatıvtik qaýlysynyń 16-tarmaǵyna sáıkes sottalýshynyń áreketi para alýǵa oqtalý retinde saralandy.
QK-niń 56-baby 3-bóligine sáıkes, qylmys jasaýǵa oqtalǵany úshin jaza merzimi nemese mólsheri tıisti bapta kózdelgen negizgi jazanyń eń joǵarǵy sheginiń 3/4 bóliginen aspaýǵa tıis, ıaǵnı 9 jyldan aspaıdy.
QK-niń 55-baby 3-bóligine sáıkes, údetilgen sotqa deıingi tergep-tekserý tártibimen qaralatyn ister boıynsha negizgi jaza merzimi nemese mólsheri tıisti bapta kózdelgen eń joǵarǵy shektiń jartysynan aspaýǵa tıis, ıaǵnı 4 jyl 6 aı (9 jyldyń 1/2 bóligi).
Sot sottalýshynyń jeke basyn, jasaǵan is-áreketiniń sıpaty men qoǵamdyq qaýiptilik dárejesin eskere otyryp, QK-niń 55-baby 3-bóligi jáne 56-baby 3-bóliginiń talaptaryn basshylyqqa alyp, Murat Ospanovqa ómir boıy memlekettik qyzmette laýazym atqarý quqyǵynan aıyra otyryp, 4 jyl 6 aı merzimge bas bostandyǵynan aıyrý jazasyn taǵaıyndady.
Sottalýshy «aǵa ádilet keńesshisi» synyptyq sheninen aıyryldy.
Úkim zańdy kúshine engen joq.
Buǵan deıin Óskemenniń burynǵy prokýrory ne sebepti qyzmettik tekserýge ilikkenin jazǵan bolatynbyz.