Rýbıo Lavrovpen Malaızııada kezdesti

ASTANA. KAZINFORM- AQSh Memlekettik hatshysy Marko Rýbıo Reseı Syrtqy ister mınıstri Sergeı Lavrovpen Kýala-Lýmpýrde ótken Ońtústik-Shyǵys Azııa elderi qaýymdastyǵy (ASEAN) syrtqy ister mınıstrleriniń kezdesýiniń kýlýarynda kezdesti, dep habarlaıdy Kazinform agenttiginiń menshikti tilshisi.

Kezdesýden soń Rýbıo Reseı-Ýkraına qaqtyǵysyn retteý boıynsha kelissózderde eshqandaı progrestiń joqtyǵyna qapa bolǵanyn aıtty, dep jazady NBC News.

- Búgin ıdeıalar, pikirler aıtyldy, men olardy prezıdenttiń qaraýyna jetkizem,-dedi Marko Rýbıo.

- Biz mundaı jaǵdaıdyń ýaqyt pen shydamdylyqty qajet etetinin bilemiz, degenmen kelissózderde eshqandaı da progrestiń joqtyǵyna qapalymyz. Biz búgingi bolǵan áńgime men aldaǵy kúnderde bolatyn oqıǵalarǵa baılanysty osy másele boıynsha Reseıdiń ustanymy men basymdyqtary qandaı ekendigi jóninde naqty biletin bolamyz dep úmittenemiz jáne sol arqyly kelissózderden nátıje shyǵarýǵa tyrysamyz, - dep qosty AQSh Memlekettik hashysy.

Reseıdiń Syrtqy ister mınıstrliginiń osy kezdesý boıynsha málimdemesinde «Reseı-Ýkraına jáne Iran men Sırııadaǵy jaǵdaı boıynsha maǵynaly, ashyq pikir almasý boldy» dep jazyldy. Sonymen qatar onda áńgimelesýshi taraptardyń shıelenisken jaǵdaıdy beıbit jolmen sheshýge umtylyp otyrǵany aıtylǵan.

Osyǵan deıin Tramp pen Zelenskııdiń Ýkraınaǵa áýe shabýylyna qarsy qorǵanys júıelerin jetkizýdi talqylaǵany týraly jazdyq.