Roza Rymbaeva Abaı oblysynyń Qurmetti azamaty atandy

SEMEI. KAZINFORM – Qazaqstan Respýblıkasynyń eńbek sińirgen ártisi Roza Rymbaeva Abaı oblysynyń Qurmetti azamaty nagradasymen marapattaldy. 

Oblys ákimdiginde «Abaı oblysynyń Qurmetti azamaty» ataǵyn tabystaý rásimi ótti. Osy ataqqa laıyq dep tanylǵandardyń ishinde ánshi Roza Rymbaeva da bar.

- Óńirdiń eń joǵary nagradasyn osymen ekinshi márte tabystap jatyrmyz. Bul – elge adal qyzmet etip, qurmetke bólengen, halyqtyń alǵysy men batasyn alǵan jerlesterimizge arnalǵan mártebeli ataq. Marapat ıeleriniń árqaısysy, óńirge, elge tanymal, - dedi Abaı oblys ákiminiń ákimi Nurlan Uranhaev. 

«Abaı oblysynyń Qurmetti azamaty» ataǵyn alǵandar:

- Qazaqstannyń Eńbek Eri, QR eńbek sińirgen artısi Roza Rymbaeva;

- QR Ulttyq ıadrolyq ortalyǵynyń bas dırektory Erlan Batyrbekov;

- Fılologııa ǵylymdarynyń doktory, professor, QR Eńbek sińirgen qaıratkeri Arap Espenbetov;

- «Samruk-Kazyna Construction» AQ Dırektorlar keńesiniń múshesi Aleksandr Mılıýtın;

- «Zaıtenov» sharýa qojalyǵynyń basshysy Erlan Zaıtenovke berildi.

«Abaı oblysynyń Qurmetti azamaty» medalindegi aıryqsha belginiń óz maǵynasy bar. Ondaǵy aq tús tazalyqty, ádildikti jáne sheksizdikti kórsetedi. 

- Kók - beıbitshiliktiń, tynyshtyq pen jaqsylyqtyń sımvoly. Altyn tús baılyq pen ulylyqty bildiredi. Belginiń ortasynda jeti qyrymen qorshalǵan Abaı oblysynyń kontýry beınelengen, olardyń árqaısysy onyń damýynyń negizgi baǵyttaryn: mádenıet, óner, bilim, ǵylym, óndiris, ınnovatsııa jáne basqa da salalardy beıneleıdi, - dep habarlady óńir ákimdiginen.

Eske salsaq, osyǵan deıin Abaı oblysynda aqyn Shákárim Qudaıberdiulyna eskertkish qoıylǵany habarlanǵan.