Roman Sklıar Pavlodar oblysynyń jylytý maýsymyna daıyndyǵyn tekserdi
PAVLODAR. KAZINFORM – Pavlodar oblysyna jumys sapary barysynda Premer-Mınıstrdiń birinshi orynbasary Roman Sklıar Ekibastuz qalasynyń jylýmen jabdyqtaý kózderindegi jóndeý jumystarynyń barysymen tanysty. Bul týraly Úkimettiń baspasóz qyzmeti habarlady.
Birinshi vıtse-premerge №3,4 energııa bloktaryn ornata otyryp, Ekibastuz GRES-2-ni keńeıtý jáne rekonstrýktsııalaý jobasynyń iske asyrylý barysy týraly málimdeldi, bul jylyna qosymsha 6,8 mlrd kVT/saǵ óndirýdi jáne stansanyń belgilengen qýatyn 1 myń MVt kóleminde arttyrady.
«Úkimet tarapynan barlyq tıisti sheshimder qabyldandy. Jabdyq óndirýshilermen, eksporttyq qarjylandyrýmen kelisimder sheshildi, sondyqtan bıyl kúzde jumysty bastaýǵa kirisińizder», - dedi birinshi vıtse-premer.
Roman Sklıar B.Nurjanov atyndaǵy «Ekibastuz GRES-1» JShS qyzmetimen tanysty. «Jańa elektr súzgilerin ornatýmen №1 energııa blogyn qalpyna keltirý» jobasy – qoldanystan shyǵarylǵan energııa bloktaryn qalpyna keltirý jónindegi úsh jobanyń sońǵysy. Ol stansanyń qazirgi jobalyq qýatyn 4 myń MVt-qa deıin ulǵaıtý maqsatynda iske asyrylyp jatyr. Stansada jobany júzege asyrý kezinde 1,1 myń qyzmetker jumyldyrylǵan. GRES-ti qysqy kezeńge daıyndaý jospar boıynsha júrgizilip jatyr.
Sondaı-aq jaqynda stansanyń tórt energııa blogynyń toqtap qalýyna qatysty másele túsindirildi. Ókinishke qaraı, mundaı jaǵdaılar oryn alyp turady. Degenmen, tutynýshylarǵa elektr qýatyn berý úzilgen joq. Roman Sklıar jaǵdaıdy muqııat zerttep, táýekelderdi azaıtý úshin qajetti sharalardy qabyldaý qajet ekenin atap ótti.
«Qys bastalǵansha sorǵy qondyrǵylarynyń senimdi jumys isteýin qamtamasyz etip, negizgi jabdyqtardyń tozýyn barynsha azaıtý kerek. Tótenshe jaǵdaılardyń aldyn alý úshin barlyq qajetti sharalardy qabyldaý qajet», — dedi vıtse-premer.
Oblys ákimi Asaıyn Baıhanov Ekibastuz qalasynyń jalpy uzyndyǵy 4 shaqyrymǵa jýyq iri jylý magıstraldary – TM-1 jáne TM-3 rekonstrýktsııalaý jumystary týraly habarlady.
«QR Úkimetiniń rezervinen 3,6 mlrd teńge bólindi. Bul jelilerdi jańartý 87-den astam kópqabatty úıdi jáne 8 myńnan astam adam turatyn 500-den astam jeke turǵyn úıdi jylýmen jabdyqtaý júıesin jaqsartýǵa múmkindik beredi», — dep atap ótti óńir basshysy.
2023 jyly 4 jylý magıstrali – 5,3 shaqyrym rekonstrýktsııalandy. Buǵan qosa, Úkimet rezervinen uzyndyǵy 3,5 km bolatyn jańa №7/1 jylý magıstralin salýǵa qarajat bólindi. Qazirgi tańda gıdravlıkalyq synaq jumystary júrgizilip, atalǵan nysan paıdalanýǵa berildi. 4 kezeńnen turǵan synaqtar ótken maýsymda 70 km-ge jýyq jelini aýystyrý esebinen zaqymdaný faktileriniń 2 ese azaıǵanyn anyqtady.
Sonymen qatar Roman Sklıar TM-7 jylý magıstralin rekonstrýktsııalaýǵa qatysty taǵy bir jobany qoldaýǵa ýáde berdi, oǵan daıyndyq smetalyq jumystary búginde júrgizilgen. Bul kúrdeli ýchaske, ony qaıta qurý №15 yqmash aýdandy jylýmen jabdyqtaý parametrlerin jaqsartady.
Jalpy alǵanda, oblys boıynsha JEO men jelilerdi jóndeý jumystary merzimderdi saqtaı otyryp júrgizilýde. Aqsýda alǵash ret oramishilik jeliler qaıta jańǵyrtylýda. Pavlodarda jelilerdi jóndeý jumystaryn qyrkúıek aıynyń basyna deıin aıaqtaý josparda bar.
Memleket basshysynyń TKSh ınfraqurylymyn keshendi qalpyna keltirý jónindegi tapsyrmalaryn oryndaý aıasynda Úkimet Ekibastuz jylý elektr ortalyǵyn odan ári jańǵyrtýǵa: tórt qazandyq agregatyn kúrdeli jáne aǵymdaǵy jóndeýge jáne tundyrylǵan sý magıstralin salýǵa 3,4 mlrd teńge bóldi. Jumys sapary barysynda Roman Sklıar Ekibastuz JEO-da júrgizilip jatqan jóndeý jumystarynyń barysyn tekserdi.
Kásiporyn basshylyǵy jumys kestege sáıkes júrip jatqanyn, jylytý maýsymynda stansa 7 qazandyqpen jumys isteıtinin, al 3 qazandyq rezervte bolatynyn habarlady.
Sonymen qatar JEO-ny kúlden gıdravlıkalyq tazartý úshin tundyrylǵan sýmen qamtamasyz etetin qubyrdyń tozyǵy jetken. Tundyrylǵan sýdyń jańa magıstralin salý jobasyn iske asyrýǵa qarajat bólinip, jumystar bastaý aldy. Jumystardy osy jyldyń qazan aıynda aıaqtaý kózdelgen.
Roman Sklıar jańa jylytý maýsymyna daıyndyqqa asa jaýapkershilikpen qaraýdy eskertip, barlyq qajetti jóndeý jumystary sapaly ári ýaqytyly júrgizilýi kerek ekenin aıtty.
Buǵan qosa, Premer-Mınıstrdiń birinshi orynbasary «Bogatyr» kómir kenishindegi tsıkldi-tolassyz tehnologııanyń ınnovatsııalyq jobasymen tanysty. Tsıkldi-tolassyz keshenniń aýqymdy qurylysy kezinde 40 myńnan astam temir-beton konstrýktsııasy qoldanyldy, 174 myń sharshy metr aýmaqqa salmaǵy 15 myń tonnadan asatyn jabdyq montajdaldy. Úsh jyldyń ishinde TsTT nysandarynyń qurylysyna qazaqstandyq kompanııalardyń merdigerlik uıymdarynyń 430 qyzmetkeri men 30 nemis mamany tartyldy.
TsTT jobasynyń basty máni – tozyǵy jetken negizgi tehnologııalyq jabdyqtardy jańartý jáne 230 metr tereńdikten kómir qorlaryn tolyq jáne utymdy qazyp alýdy qamtamasyz etý, bul – burynǵy temirjol tehnologııasyn paıdalaný kezinde múmkin emes edi.
Sondaı-aq birinshi vıtse-premerge turǵyn úı qurylysynyń barysy týraly aqparat berildi. 2023 jyly Ekibastuzda 3 kópqabatty turǵyn úı paıdalanýǵa berilgen bolatyn. Barlyǵy 4 jyl ishinde 21 KTÚ salyndy. Búgingi tańda jeke ınvestıtsııalar esebinen taǵy 3 joba júzege asyrylýda, oǵan qosa 7 bes qabatty úı salýǵa daıyn jobalar bar.
