Roman Sklıar nemis ınvestorlaryna: Jeńdi túre jumys isteýge daıynbyz

NUR-SULTAN. QazAqparat – QR Premer-Mınıstriniń birinshi orynbasary Roman Sklıar nemis bıznesmenderine elimizde sheteldik ınvestorlarǵa qandaı qoldaý kórsetiletinin aıtty, dep habarlaıdy QazAqparat tilshisi.

«Qazaqstan ekonomıkanyń taza, ınnovatsııalyq, ártaraptandyrylǵan modeline senimdi baǵyt alyp kele jatyr. Investorlarǵa keshendi qoldaý kórsetý ulttyq basymdyqtyń biri retinde aıqyndalǵan. Árbir ınvestorǵa jeke qoldaý kórsetý ári súıemeldeý ustanymy engizilgen. Memleket basshysynyń qatysýymen Shetel ınvestorlary keńesi jumys isteıdi. Premer-Mınıstr janynda ınvestıtsııalyq shtab bar. Buǵan qosa Premer-Mınıstr ınvestıtsııalyq ombýdsmen sanalady», - dedi Roman Sklıar elordada ótken Qazaqstan-german bıznes forýmynda.

Birinshi vıtse-premer aǵylshyn quqyǵyna negizdelgen táýelsiz soty, Halyqaralyq arbıtraj ortalyǵy bar Ortalyq Azııadaǵy jalǵyz «Astana» halyqaralyq qarjy ortalyǵy jumys isteıtinin atap ótti. AHQO qatysýshylaryna 50 jylǵa deıin salyqtyq jeńildikter berilip, valıýtalyq, vızalyq jáne eńbek rejımderi ońaılatylǵan.

«Elimizdiń barlyq derlik óńirindegi ekonomıkalyq basymdyqqa ıe salalarynda arnaýly ekonomıkalyq jáne ındýstrııalyq aımaqtar qurylǵan. Medıtsınalyq bilim men ǵylym salasyndaǵy aldyńǵy qatarly tájirıbe ortalyǵy bar. Nanotehnologııany, kásipkerlik pen ınnovatsııalyq ekonomıkany damytý salasynda kóptegen tehnologııalyq park jumys isteıdi», - dedi ol.

Ol Qazaqstan aýmaǵy arqyly Eýropa men Azııany jalǵaıtyn halyqaralyq kólik dálizi de ótetindigin basa aıtty.

«Elimizde ınvestıtsııalyq jáne bıznes ahýaldy jaqsartý baǵytynda júrgizilip jatqan ınstıtýtsıonaldy reformalardyń tek bir bóligin ǵana atadym. Aldymyzda jumys kóp jáne jeńdi túre jumys isteýge daıynbyz», - dedi Roman Sklıar.