Roberta Metsola EO kóshbasshylaryn batyl sheshimder qabyldaýǵa shaqyrdy
ASTANA. KAZINFORM — Roberta Metsola Eýropalyq odaqqa múshe 27 eldiń kóshbasshylary aldynda sóz sóıledi, dep habarlaıdy Kazinform agenttiginiń Brıýsseldegi menshikti tilshisi.
Búgin, Eýropalyq parlament prezıdenti Roberta Metsola 19–20 naýryz aralyǵynda ótetin Eýropalyq keńes sammıti bastalar aldynda memleket jáne úkimet basshylaryna úndeý jasady.
Sóz sóıleý jumys sessııasynyń basynda Brıýssel ýaqytymen tańǵy saǵat 10:00 shamasynda Eýropalyq keńes tóraǵasy Antonıý Koshtamen pikir almasýdan keıin ótti.
R.Metsola óz sózinde úsh negizgi baǵytqa toqtaldy: Eýropanyń básekege qabilettiligi, energetıka jáne geosaıası syn-qaterler. Ol jahandyq turaqsyzdyq kúsheıip jatqan kezeńde batyl sheshimder qabyldaý qajettigin atap ótti.
Eýroparlament prezıdenti «jaıly» sheshimderden bas tartyp, aldaǵy qadamdar qıyn bolsa da alǵa jyljý kerektigin aıtty. Onyń pikirinshe, bul barlyq deńgeıde, sonyń ishinde qarjy qyzmetteri salasynda jeńildetý júrgizýdi talap etedi. Sonymen qatar, ol Eýroparlamenttiń ókilettikterin saqtaı otyryp, «dástúrden tys» tásilderdi qoldanýdy qoldady.
Sondaı-aq R.Metsola Jınaq jáne ınvestıtsııalar odaǵyn (Savings and Investments Union) qurýdy jedeldetý jáne EO ishinde ınvestıtsııalardy yntalandyrmaıtyn retteýshi talaptardy qaıta qaraý qajettigin atap ótti.
— Búginde básekege qabilettilik — bul tek ósim ǵana emes, sonymen qatar qaýipsizdik máselesi, — dedi ol.
Onyń aıtýynsha, Eýropa «kúsh tilinde» sóıleı alý úshin ekonomıkalyq qýatqa ıe bolýy kerek.
Eýroparlament prezıdentiniń sózinen keıin sammıt qatysýshylarynyń jumys sessııalary jalǵasady. Sonymen qatar, Antonıý Gýterreshpen túski as josparlanǵan.
Sammıttiń qorytyndy sheshimderi 20 naýryz keshke jarııalanady dep kútiledi. EO kóshbasshylarynyń kezdesýi kúrdeli jaǵdaıda ótýde: sońǵy aptalarda Taıaý Shyǵystaǵy daǵdarys pen jetkizý tizbekteriniń buzylýyna baılanysty gaz baǵasy 50%-ǵa, al munaı 27%-ǵa qymbattaǵan.
Buǵan deıin Eýroodaq Lıvandaǵy jaǵdaıǵa qatysty málimdeme jasaǵanyn habarlaǵanbyz.