Rıshı Cýnaktyń partııalastary arasynda bedeli túse bastady
Ulybrıtanııa premer-mınıstri Rıshı Sýnaktyń saılaýshylar aldynda ǵana emes, partııalastary arasynda da bedeli túse bastady. Osy aptada ol Rýandaǵa zańsyz mıgranttardy jer aýdarý zańnamasyn parlamentte ótkizgenimen alaqaılaýyna áli erte. Óıtkeni zań tolyq qabyldanbady jáne partııasynda aýyzbirshilik joq. Torıler aqqý, shortan hám shaıannyń kebin kıip, ortaq mámilege kele almaı júr, dep habarlaıdy Kazinform tilshisi.
Rýanda boıynsha zań jobasyn júzege asyrýdyń birinshi kezeńi Qaýymdar palatasy arqyly ońaı ótti. Depýtattardyń kópshiligi Premer-Mınıstrdiń bastamasyn qoldady.
Bul — Joǵarǵy sottyń sheshimine qaramastan zańsyz mıgranttar Afrıkaǵa jóneltilýi múmkin degen sóz.
Deıturǵanymen, Rıshı Sýnakty úlken synaqtar kútip tur deıdi onyń seriktesteri. Premer-mınıstr shaǵyn qaıyqtarǵa shúıligýdiń ornyna nazaryn budan da mańyzdy máselelerge aýdarýy kerek-mys.
«Biz bárimiz premer-mınıstrdiń jetistikke jetkenin qalaımyz. Ol qaıyqtardy toqtatýǵa ýáde berdi, biraq úkimet zań jobasyn qaıtaryp alyp, odan da nátıjeli jumys isteıtin jańa nusqasyn daıyndaǵany durys bolar edi», — deıdi Ulybrıtanııa parlamentiniń múshesi Mark Fransýa.
Jospar jáıimen qaldy. Reıtıngter Rıshı Sýnakty maqtap turǵan joq. Bılik partııasyndaǵy áriptesteri de ony jaqtamaı otyr. Torıler azamattyq soǵys jaǵdaıynda júrgendeı.
Buǵan konservatorlardyń óz kóshbasshysyn taqtan qulatýǵa áýestigin qosyńyz. 2019 jyly ótken jalpy saılaýda jeńiske jetip, bylyqqa ábden batqan Borıs Djonson úsh jyldan keıin qyzmetinen qýyldy.
Lız Trass ekonomıkalyq saıasatty sátsiz júrgizgeni úshin 50 kúnnen keıin otstavkaǵa ketýge májbúr boldy.
«Taǵy da Torıler partııasy sátsizdikke ushyrady, al biz olardyń qatelikteri úshin jaýap berip jatyrmyz. Qazir premerdiń oıyny osyldy, ábden sharshady. Ótken aptada partııalastary ol týraly „qolynan is kelmeıdi“, „tájirıbesiz“, „tákappar“ jáne „nashar saıasatker“ dep aıtqan bolatyn», — dedi oppozıtsııalyq Leıborıster partııasynyń kóshbasshysy Kır Starmer.
Torı partııasy birneshe qarsylastar lagerine bólingendeı. Konservatorlar saılaý naýqanynyń jetekshisi eskertý jasap, olardy birlikke shaqyrdy.
Qarasha aıynda Іshki ister mınıstri qyzmetinen bosatylǵan Sýella Braverman da Torılerdiń jeńiliske qaraı bet alǵanyy aıtyp, betine basqan bolatyn.
«Eger biz sátsizdikke ushyraýy múmkin taǵy bir zań jobasyn qabyldasaq, konservatorlar eldiń esinde qalmaıtyn partııa múshelerine aınalýy múmkin. Biz jeńis úshin kúresemiz be, álde partııamyzdyń joıylýyna jol beremiz be?» — dedi Ulybrıtanııa Іshki ister mınıstrliginiń burynǵy mınıstri Sýella Braverman.
«Rıshı — máselelerdi myqty sheshedi». Daýnıng-strıttegiler dál osylaı aıtqandy unatady.
Jyldyń birinshi jartysynda Sýnak shynymen de keı kúrdeli máselelerdiń sheshimin tapty.
Mysaly, «Vındzor kelisimi» atty jańa mámile Soltústik Irlandııa men Ulybrıtanııa arasyndaǵy taýar tasymalyna bóget bolǵan kedendik tekserýlerdi júıeledi. Biraq ol týraly qoǵamdyq pikir ózgermedi.
«Meniń oıymsha, úkimet oryndalýy neǵaıbyl josparlar qurady. Aqshany ysyrap etedi. Olar nazardy basqa arnaǵa burýy kerek”, — deıdi 70 jastaǵy zeınetker Maık Kreıg.
«Sýnaktyń josparlary júzege aspaıdy. Ol týraly úkimettegiler pessımıstik kózqarasta. Iá, premer sál oılanǵany jón», — deıdi 73 jastaǵy zeınetker Ketrın Egbert.
Sýnak Ulybrıtanııany jasyl energetıka boıynsha álemdegi iri memleket sanaıdy, biraq Soltústik teńizde munaı men gazdy burǵylaýǵa ruqsat etip otyr. Elge sheteldik jumysshylardy kóbirek tartýǵa tasyrma berip, 3 aıdan keıin aınyp qaldy.
Óıtkeni zańdy kóshi-qon deńgeıi rekordtyq kórsetkishke jetti. Sondaı-aq Torıdiń burynǵy basshylaryn jamandap, eks premer-mınıstr Devıd Kemerondy qyzmetke shaqyrady.
Buǵan Grekııamen jaqynda bolǵan dıplomatııalyq daýdy qosyńyz.
Qarama-qaıshylyqtarǵa toly is-áreketi men strategııalyq kóshbasshylyqtyń bolmaýy aldaǵy saılaýda sátsizdikke ákelýi múmkin, dep Torılerdiń ózderi aıtyp otyr.
