Rıkardo Marını: Bozjyraǵa saýatty basqarý kómektesedi

MAŃǴYSTAÝ. QazAqparat – Italııanyń sáýlet jáne qala qurylysy salasyndaǵy tanymal sarapshysy, Urban Living konsaltıngtik kompanııanyń ókili Rıkardo Marını Mańǵystaý oblysyndaǵy Bozjyra shatqalyna baryp, aımaqtaǵy ekologııalyq týrızmdi damytý múmkindikteri jaıynda aıtty. Qalalar men qoryq aımaqtarynda jobalardy júzege asyryp júrgen mamannyń aıtýynsha, Bozjyrany saqtap qalýǵa saýatty basqarý kómektese alady, dep habarlaıdy QazAqparat.

«Bul tamasha jer. Bul – tek jergilikti turǵyndar úshin ǵana emes, búkil álem týrısteri úshin jańa álem. Eger tabıǵat ásemdigi men adamdardyń ony kórý nıetiniń arasynda janjal týyndasa, tabıǵı ortaǵa qaýip tónýi múmkin. Sondyqtan bul qundylyqty saqtap, qorǵap qalý óte mańyzdy. Bul jaǵdaılar basshylyqtyń teris jolda ekenin bildiretin belgi. Adamdar ózderi qalaǵan jerinde júredi. Osy jerde júrip baıqaǵanym, plastık jáne shyny bótelkeler shashylyp jatyr», - dedi R.Marını tilshilerge.

Sarapshy Bozjyra sııaqty tabıǵı resýrstardy saqtap qalýda ınfraqurylym, kommýnıkatsııalar jáne bilim sııaqty ajyramas elementter retinde úılesimdi bolýy tıis ekendigin atap ótti. Ol sondaı-aq shalǵaı aýdanda qonaqúı qurylysyna qatysty pikirin bildirdi.

«Eger qonaqúı resýrstary shatqaldy qorǵaý, aǵartý, jáne ol týraly habardar bolýǵa baǵyttalsa, eger ınvestorlar jobany qorshaǵan ortaǵa úlken qamqorlyq jasap iske asyrsa, eger maksımaldy túrde qaldyqsyz mehanızm bar bolsa, onda bul óte jaqsy ıdeıa. Shatqaldyń túbine jaıaý, atqa minip nemese elektromobılmen túsý kerek. Eger týrısterge tabıǵat aıasynda júrý tártibin, qoqys jınaý qajettiligin túsindiretin nusqaýlyqtar bolyp, olar durys qoldanylsa, búkil álemdegi tabıǵat eskertkishteri sııaqty, Bozjyra shatqalyn da turaqty damytýǵa bolady», - dedi sarapshy.

Ol jaqsy oılastyrylǵan basqarýdyń sondaı-aq jergilikti jerdi mekendeıtin janýarlardyń joıylýyna jol bermeýge bolatynyna sendirip otyr.

«Eger ınfraqurylym jete damytylsa, janýarlar joıylmaıdy. Búkil álemde, Afrıkada, tipti Eýropada adamdarǵa álsiz ekojúıelerde júrýge múmkindik beretin kóptegen jerler bar. Munda kelýshiler tek jergilikti flora men faýnany qurmettese bolǵany. Órmekshilerdi baspaı, baıqap júretin arnaıy mádenıet bolýy tıis», - dedi ol.

Bozjyra shatqalynda safarı-qonaqúıdi salý ıdeıasyn qazirgi kezde qoǵamdyq belsendiler, jergilikti turǵyndar jáne ǵalymdarmen talqylanyp otyrǵanyn atap ótý kerek.