Rıdderdegi jylý ortalyǵyn jóndeýge bıýdjetten qansha qarjy bólingeni belgili boldy

ÓSKEMEN. QazAqparat – Shyǵys Qazaqstan oblysy Rıdder qalasyndaǵy jylý elektr ortalyǵyn jóndeýge memlekettik bıýdjetten qansha qarjy bólingeni belgili boldy, dep habarlaıdy QazAqparat tilshisi.

Qala ákimdiginiń málimetine súıensek, Rıdder JEO-nyń 6 qazandyǵyn jóndeýge Úkimet rezervinen 7,3 mlrd teńge bólingen. Al ortalyqtyń jylý jelilerin jóndeýge 1,1 mlrd teńge jumsalady. Al sondaǵy qosalqy jabdyqtardy rekonstrýktsııalaý jumystary oblystyq bıýdjetten qarjylandyryldy. Naqty aıtqanda, osy maqsatta 570 mln teńge bólindi.

«Qazirgi ýaqytta jylý elektr ortalyǵynda jóndeý jumystary belsendi júrgizilýde. Qarjy jáne jumys kúshi jetkilikti. 3 ortasha qysymdy qazandyqtaǵy jumystardyń 65%-y oryndaldy. Olar birinshi kezekte iske qosylady. Qajetti materıaldardyń negizgi bóligi jetkizilgen. Keıbir jabdyqtar áli jolda kele jatyr. Biraq barlyǵy 5-shi qyrkúıekten keshikpeı keledi», - deıdi Rıdder qalasynyń ákimi Dáýlet Batyrbaev.

Onyń aıtýynsha, 15 qyrkúıekke deıin qazandyqtar iske qosylady. Ortalyqty jóndeýge kerekti qarajat memlekettik bıýdjetten tek shilde aıynyń sońynda bólingen. Al oǵan deıingi jóndeý jumystaryna «Qazmyrysh» AQ kómek kórsetken.

Aıta keteıik, qazirgi ýaqytta JEO-da 500-ge jýyq adam jumys istep jatyr. Kúndizgi aýysymda 400, túnde 100 adam eńbek etýde.

Eske salsaq, byltyr 23 qazanda Rıdderdegi jylý elektr ortalyǵynda apat bolyp, halyq jylýsyz qalǵan. Keıin JEO sapasyz mazýttyń saldarynan jumysyn toqtatqany aıtyldy.

Jylytý maýsymy aıaqtalǵanda ortalyqtaǵy barlyq 6 qazandyq kúrdeli jóndeýden ótetindigi habarlandy. Tamyz aıynyń ortasynda ondaǵy kúrdeli jóndeý jumystary jartylaı aıaqtalǵan edi.