Rıdderde tabylǵan qonjyq Óskemendegi zoobaqqa jetkizildi

ÓSKEMEN.KAZINFORM — Rıdder qalasyndaǵy saıajaılar aýmaǵyn birneshe kún boıy aınalshyqtap júrgen qonjyq qazir Óskemendegi zoobaqqa jetkizildi.

Anasynan aıyrylyp, jabaıy tabıǵatta ómir súre almaı qalǵan qonjyq qala aýmaǵyna kirip ketken. Ony baıqaǵan jergilikti jurt tamaqtandyryp ta júrgen.

Kóp uzamaı Orman jáne ańshylyq sharýashylyǵynyń jedel áreket etý tobynyń qyzmetkerleri kelip túz taǵysyn torǵa túsirip, Óskemendegi Soljaǵalaý zoobaǵyna jetkizdi.

— Qonjyq uzaq ýaqyt ash júrgendikten qatty álsiregen. Qazir ol veterınarlardyń baqylaýynda. Qajetti ekpeler salynyp jatyr, — deıdi Soljaǵalaý saıabaǵy kesheniniń bas veterınarlyq dárigeri Jumaǵalı Qadyrbaev.

Qazir qonjyq et, jarma, kókónis jáne jemis-jıdekpen qorektenip jatyr.

Eske salsaq, osyǵan deıin Rıdderde jedel top aıýlardy úrkitip, eldi meken mańynan alshaqtatqany habarlanǵan.