Rıdderde 70-ten asqan zeınetker dúkende esirtki saqtaǵan

RIDDER. QazAqparat – Shyǵys Qazaqstan oblysy Rıdder qalasynda 73 jastaǵy zeınetker dúkende esirtki saqtaǵan, dep habarlaıdy QazAqparat tilshisi.

ShQO Polıtsııa departamenti Esirtki qylmysyna qarsy kúres basqarmasynyń qyzmetkerlerine Rıdder qalasy turǵynynyń esirtki saqtaǵany týraly habar kelip tústi. Jedel ýákilder aqparatty tekserýge kirisken.

Tintý júrgizý barysynda 73 jastaǵy zeınetkerge tıesili dúkennen keptirilgen kóknár sabaǵy tabyldy. Saraptama qorytyndysyna sáıkes, esirtkiniń jalpy salmaǵy 30 gramnan asady.

«Atalǵan fakti boıynsha QR Qylmystyq Kodeksiniń 296-baby 2-bóligine sáıkes (esirtki zattarymen zańsyz jumys isteý) sotqa deıingi tergeý amaldary bastaldy. Esirtki qylmysyna qarsy is-qımyl ІІM-niń basym mindetteriniń biri. Osy baǵyttaǵy jumys úzdiksiz júrgizilýde», - dedi oblystyq PD bastyǵynyń orynbasary Talǵat Shaıahmetov.