Reıhstagqa tigilgen Jeńis týynyń kóshirmesi Astanada saqtaýly tur
ASTANA. KAZINFORM — QR Qarýly Kúshteriniń Áskerı-tarıhı mýzeıinde 1945 jyldyń mamyrynda Reıhstagqa tigilgen Jeńis týynyń kóshirmesi saqtaýly tur.
Bul eksponat 2015 jyly Qazaqstanǵa tabystalyp, sodan beri patrıottyq tárbıeniń jáne mýzeı ekspozıtsııasynyń ajyramas bóligine aınaldy. Kazinform agenttigine bergen suhbatynda mýzeı jetekshisi Dáýlet Qadyrov bul týdy mýzeıdegi eń qundy jádigerlerdiń biri dep atady.
— Bul eksponat 2015 jyly mýzeıimizge tabystaldy. Sol jyly Reseıdiń qorǵanys mınıstri bolǵan Sergeı Shoıgý saltanatty jaǵdaıda ony Qazaqstannyń qorǵanys mınıstri bolǵan Imanǵalı Tasmaǵambetovke tapsyrǵan edi, — dedi ol.
Áńgime Berlın shabýylynda sheshýshi ról atqarǵan 150-atqyshtar dıvızııasynyń jaýyngerlik týynyń kóshirmesi jaıynda bolyp otyr. Qazaqstandyqtar úshin bul erekshe maqtanysh, sebebi dál osy dıvızııa quramynda qazaq jaýyngerleri boldy. Al Reıhstagqa qyzyl týdy alǵashqylardyń biri bolyp Rahymjan Qoshqarbaev tikti.
— Jeńis týynyń 9 kóshirmesi jasalǵan. Biraq alǵashqylardyń biri bolyp, 1945 jyldyń 30 sáýirinde qoldan jasalǵan qyzyl týdy dál bizdiń jerlesterimiz — Rahymjan Qoshqarbaev pen Grıgorıı Býlatov tikken bolatyn. Al resmı Jeńis týy Reıhstagtyń kúmbezine 1 mamyrda tigildi, — dep túsindirdi D. Qadyrov.
Búginde mýzeıde 23 dıvızııa men brıgada týlarynyń kóshirmeleri qoıylǵan, olardyń 16-sy Qazaqstan aýmaǵynda qurylǵan. Barlyǵy áskerı tarıh zalyna ornalastyrylǵan jáne árbir kelýshi qazaqstandyqtar qyzmet etken quramalardyń erlikterimen tanysa alady.
— Biz kóshpeli kórmelerge belsendi qatysamyz, Jeńis týyn mektepterge, ýnıversıtetterge, elimizdiń basqa qalalaryna aparamyz. Bul — óte mańyzdy mıssııa. Jastar men óskeleń urpaqqa Jeńistiń qandaı eńbekpen kelgenin kórsetýimiz kerek, — dep atap ótti spıker.
Eksponattardy saqtaý úshin mýzeıde temperatýra, ylǵaldyq jáne jaryq rejımi qatań saqtalady. Qyzmetkerlerdiń aıtýynsha, mundaı jádigerlerdi sýretke túsirýge tyıym salynǵan. Alaıda kóshirme bolǵandyqtan, ony bilim berý jáne patrıottyq maqsatta qoldanýǵa ruqsat.
— Jeńis týynyń túpnusqasy Máskeýde saqtaýly. Bizde — kóshirmesi, sondyqtan ony saqtaý sharttary qoǵamdyq is-sharalarǵa qatysýǵa múmkindik beredi. Al Astanadaǵy Jeńis týy — keńes jaýyngerleriniń, onyń ishinde myńdaǵan qazaqstandyqtyń erligi, batyrlyǵy men tabandylyǵynyń belgisi, — dep tolyqtyrdy Dáýlet Qadyrov.
Aıta keteıik, 7 mamyrda Astanadaǵy Táýelsizdik alańynda Jeńistiń 80 jyldyǵyna arnalǵan áskerı parad ótedi. Bul shara 2025 jyldyń basty oqıǵalarynyń biri bolmaq.
Sondaı-aq, 9 mamyrda demeýshilik qarajat esebinen uıymdastyrylatyn merekelik otshashý ótedi.