Revaktsınalaý ujymdyq ımmýnıtetti kúsheıtedi – dáriger

ALMATY. Qazaqparat - Revaktsınalaý ujymdyq ımmýnıtetti kúsheıtedi. Bul Almaty ortalyq klınıkalyq aýrýhana dırektorynyń orynbasary Elvıra Ibragımova brıfıng barysynda aıtty, dep habarlaıdy QazAqparat tilshisi.

«Almatylyq dárigerler halyqty koronavırýsqa qarsy vaktsınatsııalaý ıdeıasyn tolyq qoldaıdy. Sebebi revaktsınalaý ujymdyq ımmýnıtetti kúsheıtedi. Ázirge ujymdyq ımmýnıtet tolyq qalyptasqan joq, epıdemıologııalyq jaǵdaıdyń turaqtanýyna qaramastan, ınfektsııanyń odan ári taralý qaýpi bar», - deıdi spıker.

Sonymen qatar, ol COVID-19 ońaı ózgerip, mýtatsııalanatynyn jáne kóbeıetinin eske saldy. «Halyqty qaıta vaktsınalaý algorıtmi bar. Vaktsına salý erikti túrde júrgiziledi. Ekpeni qalada jumys isteıtin 137 pýnkttiń kez kelgeninen alýǵa bolady. Azamattarǵa koronavırýstyń úshinshi vaktsınatsııasyn birinshi kýrs tolyq aıaqtalǵannan keıin 6-9 aıdan keıin jasaý usynylady. Antıdene deńgeıin aldyn-ala anyqtaý qajet emes», - dedi ol. Elvıra Ibragımovanyń aıtýynsha, ımmýnıteti álsiz, sozylmaly aýrýy bar jáne qart adamdarǵa revaktsına jasaýdy usyndy.

«Birinshi kezekte koronavırýsqa osal azamattardyń sanattary: medıtsına qyzmetkerleri, pedagogtar, quqyq qorǵaý organdarynyń ókilderi qaıta vaktsına ala bastaıdy»,- dedi spıker.