Respýblıka kúni: Týǵan aýylyn túletken azamat «Qazaqstannyń Eńbek eri» atandy
Qyzylordalyq «Tań LTD» JShS dırektory Imamzada Shaǵyrtaevqa «Qazaqstannyń Eńbek Eri» ataǵy berildi. Ony jerlesteri uzaq jyldar boıy aýyl sharýashylyǵy salasynda jemisti eńbek etip, týǵan aýylyn túletýge kúsh salǵan azamatqa berilgen laıyqty baǵa dep sanaıdy, dep habarlaıdy Kazinform.
«Tań» aýyly «Batys Eýropa – Batys Qytaı» avtobanynyń boıynda ornalasqan. Tarıhı derekterde osy tóńirekte 1926 jyly №17 «Eltaı» aýyldyq keńesi qurylǵany jóninde aıtylady. Keler jyly «Umtyl», «Qorǵansha», «Qyzyl saıa», «Samyrat» atty seriktestikter paıda bolady. Atalǵan seriktestikter ujymdyq sharýashylyq bolyp birigip, oǵan ortaq ataý berý jóninde oılastyrylady. Aýyldaǵylar eldi mekenge jańa ataý jóninde oılasyp otyrǵan sátinde tań da araılanyp atqan eken. Eldiń qadirlisi bolǵan Segizbaı bı aýylǵa bolashaǵy jarqyn bolsyn degen nıetpen sol ataýdy qoıýdy uıǵarypty.
Qyzylorda oblysy Jalaǵash aýdanyna qarasty «Tań» aýylynda dúnıege kelgen Imamzada Shaǵyrtaev 2003 jyldan bastap «Tań LTD» JShS dırektory qyzmetin atqarady. Oblystyq máslıhatynyń VI-VII shaqyrymdarynyń depýtaty atanǵan azamat óziniń týǵan jerinde kúrish sharýashylyǵyn damytýda tolaıym tabystarǵa kenelip otyr.
Búginde seriktestik «Tańnan» ózge Jalaǵash aýdanyndaǵy «Maqpalkól» jáne Qarmaqshy aýdanyndaǵy «Aqjar» eldi mekenderinde kúrish egedi. Onyń jalpy kólemi – 3 800 gektar.
Sharýashylyqta jylma-jyl úzdik eńbekkerlerge jańa kólikter berip, turǵyn úımen qamtamasyz etý jaǵdaıy jaqsaryp keledi. Mundaı jaqsy úrdis 2011 jyldan bastaldy. Sol jyly sharýashylyqtyń 2 ozat eńbekkerine «Lada-2117» avtokóligi berildi. Bul ıgilikti is sodan beri toqtaǵan emes. Ásirese 2016 jyldan bastap kóbeıdi. Mundaı marapattan seriktestikke qarasty kórshi aýyldardaǵy sharýashylyq jumysshylary da tys qalyp júrgen joq. Osylaısha jylma-jyl qarapaıym eńbek adamdaryna 6 kólikten berilip keledi.
Sondaı-aq sharýashylyq óz eńbekkerlerine syıaqy taǵaıyndaýdy da nazarǵa alyp keledi. Egin sharýashylyǵynda jemisti eńbek etip júrgen azamattar mıllıon teńge shamasynda qarjylaı syıaqyǵa ıe bolyp júr.
Keıingi jyldarda sharýashylyq «Tań» aýylynda áleýmettik nysandar salý isin qolǵa aldy. Oǵan deıin eldegi úı salý, basqa da turmystyq jaǵdaılarǵa baılanysty kómek berilip keldi. Qazir seriktestiktiń qoldaýymen balabaqsha, sport kesheni boı kóterdi. Jylma-jyl ortalyqty kóriktendirý jumystaryn umyt qaldyryp júrgen joq. Úlken joldan eldi mekenge kireberisten beri qaraı jol boıy men keıbir kósheler jaryqtandyrylyp, jıegine tal otyrǵyzyldy. Qorshaýynyń ózine 10 mln teńge ketti. Sharýashylyqtyń eki brıgadasy sol eki jaqtaǵy egilgen taldardyń jaǵdaıyna jaýapty bolyp bekitilgen. Oǵan qosa «Tań» aýylynyń irgeles jatqan «Jańaqonys» aýylyna baratyn jol qatynasyn jóndeýge sharýashylyq tehnıka men qarjy bóldi. Aýylda «Taǵzym» alańy qaıta jańardy.
2019 jyly paıdalanýǵa berilgen sport kesheninde aýyldyń 95 balasy dzıýdo men taekvandonyń qyr-syryna qanyǵyp keledi. Jalpy sharýashylyq mádenıet úıi, ortalyq alań, kóshelerdegi ár úılerdiń syrtqy qorshaýy, kórkeıtý-kógaldandyrýǵa qarjy salǵan. Aýylǵa sán berer úlken ásem saǵat ta ornatqan. Jyl saıyn kóshe joldaryn tazalaý, gúl ósirý sııaqty jumystardy turaqty istep otyr.
Aýyldaǵy jaǵdaı jaqsarǵandyqtan qazir eldi mekenge kóship keletin turǵyndar sany artyp keledi. Qazir jylyna kem degende 4-5 otbasy kóship kelýde. «Tańnyń» ózinde úı salatyn jer tarshylyq etip otyr. «Jańaqonysta» mektepke baratyn 30 shaqty bala bar. Arnaıy shaǵyn avtobýs bólinip, eki mezgil balalardy mektepke tasıdy.
Taǵy bir jańalyq, sharýashylyq basshylary mektep oqýshylaryna dombyra úıretýge yqpal jasapty. Sharýashylyq tarapynan mýzyka pániniń jetekshisine 15 dombyra berilgen. Úıirme qurylyp, qazir jumys júrýde. Sondaı-aq lager men túrli jarysqa baratyn oqýshylar men jetekshilerine de udaıy qoldaý kórsetiledi.
Tań aýylynda jartylaı daıyn et ónimderin daıyndaıtyn tseh jumys isteıdi. «TAN FOOD» markasymen shyǵatyn tseh jeti túrli ónimdi naryqqa shyǵaryp keledi. Bul óndiris ornynyń ashylǵanyna tórt jylǵa jýyqtap qaldy. Kásipti óristetýge aımaqtaǵy «Baıqońyr» áleýmettik-kásipkerlik korporatsııasy kómektesken. Qazir aýyldaǵy tsehta bes adam turaqty jumys isteıdi. Jobanyń jalpy quny – 144 mıllıon teńge. Sharýashylyq esebinen oǵan 56 mıllıon teńgeden astam qarjy quıylǵan. Tsehqa kerekti mal soıý jáne etti óńdeýge arnalǵan qurylǵylar satyp alynǵan. Ónimder oblystaǵy dúkenderge satylymǵa shyǵarylýda.
Shaǵyn óndiris ornynda kúnine 5 iri qara soıýǵa bolady. Tseh tolyqtaı zamanaýı jabdyqtarmen jaraqtalǵan. Mal jartylaı avtomatty túrde soıylady. Manty, tushpara, farsh pen kotlet sekildi jartylaı daıyn ónimnen bólek, «Sybaǵa», «Bir asym et» atymen arnaıy qaptamadaǵy sıyr men jylqy eti de daıyndalady. Qosymsha qazy-qarta, jal-jaıa da bar.
