Respýblıka kúni qarsańynda «Telman» turǵyn alabyna gaz berildi
ASTANA. KAZINFORM — Ulttyq merekege oraı Astana qalasynyń sol jaǵalaýynda ornalasqan «Telman» turǵyn alabynda tabıǵı gazben jabdyqtaý júıesi iske qosyldy, dep habarlaıdy «QazaqGaz Aimaq» AQ baspasóz qyzmeti.
Osylaısha qys maýsymynda tútinge kómiletin elordanyń ekologııasyn jaqsartýǵa qadam jasaldy.
— Memleket basshysynyń tapsyrmasymen elimizdi gazdandyrý júrip jatyr. Gaz bar, biraq ony halyqqa jetkizý úshin ınfraqurylym kerek. Osy oraıda talmaı eńbek etýdegi barsha tarapqa alǵys aıtamyn, — dedi Májilis depýtaty Edil Jańbyrshın shara barysynda.
Gaz qubyrynyń jalpy uzyndyǵy 22,6 shaqyrymdy quraıdy. Qala ákimdigi jáne «QazaqGaz» ulttyq kompanııasy men onyń enshiles kásiporny «QazaqGaz Aimaq» AQ birlese júzege asyrǵan ıgilikti is nátıjesinde 308 turǵyn úı kógildir otynǵa qol jetkizdi. Sonymen qatar, arnaıy qosyndar gaz qysymyn rettep, mamandar onyń turǵyndarǵa saǵatyna 15 380 tekshe metr kólemde úzdiksiz ári turaqty berilýin qamtamasyz etpek.
— Bas qalany gazdandyrý zııandy qaldyqtar men qatty zattardyń shyǵarylýyn aıtarlyqtaı azaıtady. Qajetti sharalar qaýipsizdik sharalaryn saqtaı otyryp iske asýda. Qala halqynyń ósýine oraı oǵan qyzmet kórsetý jumystarynyń kólemi de, sapasy da artyp keledi, — dep atap ótti «QazaqGaz Aimaq» AQ Astana óndiristik fılıalynyń dırektory Ýálıhan Qymbatov.
Eske sala ketsek, elordany gazdandyrý 2019 jyldan beri júrgizilip keledi. Osylaısha Táýelsizdik jyldaryndaǵy eń iri ınfraqurylymdyq jobalardyń biri — «Saryarqa» gaz qubyry tóseldi. Jeke úılerden bólek, jylý-elektr ortalyqtary gazben isteıdi.
— Elimizdiń bas qalasynda qurylys belsendi júrip jatqany belgili. Saldarynan jylýdyń jetispeýi múmkin ekenin sezemiz. Onyń ústine sýyq kezde tútinge tunshyǵyp, ábigerge túsemiz. Endi súıikti qalamyzdyń aýasy tazaryp, úıimiz jylýǵa toldy, — dedi gazǵa alǵash qosylǵan zeınetker Baıan Zennatqyzy.