Respýblıka qaharmandary: Túrkistandyq hırýrg jylyna 500-den astam ota jasaıdy
Jáńgirhan Bımahanuly 32 jyldyq eńbek jolynda 10 000 astam ota jasaǵan. Al, jylyna shamamen 400-500 aralyǵynda operatsııa jasap, naýqastardyń qalypty ómirge qadam basýyna uıytqy bolýda. Qoly jeńil hırýrgtyń biliktiligin kópshilikte joǵary baǵalaıdy. Sondyqtan kórshiles aýdandardan kelip kómek berýin ótinetinder kóp. Tipti kórshiles oblystardan arnaıy izdep kelip, keńes alyp ketetinder de bar. Ondaı jaǵdaıda, bilikti maman árdaıym alǵashqy kómek berýge ázir.
«Jalpy, hırýrg bolý óte qıyn. Adamnyń qanyn kórý, onymen jumys jasaý kez kelgen adamnyń qolynan kele bermeıdi. Úlken jaýapkershilikti talap etedi. Operatsııa jasamas buryn qalaı bolar eken dep oılanyp shyqsaq, al operatsııadan keıin de túnimen uıyqtaı almaıtyn kezderimiz bolady. Dárisin berip, ýkolyn salyp ketetin basqa salalarǵa qaraǵanda, hırýrgııa salasynyń salmaǵy óte aýyr» - deıdi dáriger.
Kentaý qalalyq aýrýhanasynyń hırýrgııa bóliminde eki laparoskopııalyq apparat bar. Onyń bireýi jalpy hırýrgııaǵa, ekinshisi gınekologııalyq operatsııalar jasaýǵa arnalǵan. Sondaı-aq ót jolynan tas alatyn apparattar men ózge zamanaýı qurylǵylarmen jabdyqtalǵan. Qazirgi tańda aýrýhanadaǵy barlyq hırýrgııalyq, gınekologııalyq, ýrologııalyq otalar endovıdeohırýrgııa jolymen jasalynyp jatyr. Sońǵy jyldary bul tizimge taǵy 30-ǵa jýyq ota túrleri qosyldy. Mundaǵy eń basty erekshelik - ota jeńil jasalatyndyqtan naýqasta tez saýyǵyp ketedi.
«Sońǵy kezde ót tasy, soqyr ishek pen shab jáne basqa da jaryqshaptar boıynsha da aýrýhanaǵa túsip jatqan naýqastar kóbeıip ketti. Munyń basty sebebi durys tamaqtanbaý. Astaǵy hımııalyq zattardyń kóp bolýy. Sondaı –aq, ómirdegi kúızelis. Sondyqtan ár adam salaýatty jáne salamatty ómir saltyn ustaný kerek. Ýaqytyly densaýlyǵyna kóńil bólip, der kezinde dárigerge kórinse kez kelgen aýrýdyń aldyn alýǵa bolady» - deıdi ol.
Jalpy Jáńgirhan Bımahanuly 2001 jyly oblysta tuńǵysh ret «Laparoskopııalyq hırýrgııany» engizgen dáriger. Al, 2013 jyly «Laparoskopııalyq appendektomııadaǵy jańa baılaý ádisin» engizip QR-nyń ádilet mınıstrliginiń zııatkerlik menshik quqyǵy komıtetinen №80989 «Avtorlyq kýálik» aldy. 2020 jyldyń maýsym aıynda «Densaýlyq saqtaý salasyndaǵy ekonomıka jáne bıznes» magıstri atandy. Qazirgi de hırýrg óz bilimin jıi-jıi jetildirip otyrady. Kóp oqyp, kóp izdenedi. Tipti, Máskeý, Sankt-Peterbýrgte bolyp, bilikti dárigerlermen tájirıbe almasyp keldi. Al, boıyndaǵy bar bilimin áriptesterimen bólisý, úıretý kúndelikti isi.
«Operatsııany jeńil, aýyr dep bólýge bolmaıdy. Jasalǵan otanyń barlyǵy da, árıne, aýyr. Birde soqyrishek aýrýyna operatsııa jasaýǵa kirip bara jatqanmyn, naýqas balanyń ata-anasy qansha saǵatta bitetinin surady. «Jaı soqyrishek qoı, qazir 15 mınýtta bitirip tastaımyz» dep ishke kirip kettim. Biraq bári de biz oılaǵandaı bolmady. Sol operatsııanyń qıyn bolǵany sonshalyq bir jarym saǵatqa sozyldy. Al, perzenthanada bosanǵan áıelge jasalǵan operatsııa 8 saǵatqa ulasty. Eshqandaı dem almaı turyp jasadyq. Nátıjesi durys shyqty» - deıdi ol.
El ishinde «Hırýrgtyń qoly – áıelderdikindeı názik, kózi – búrkittikindeı qyraǵy, júregi – arystandykindeı aıbatty bolýy kerek» degen naqyl sóz bar. Al, Jáńgirhan Bımahanuly «hırýrgtyń sózi de durys bolýy kerek» dep esepteıdi. Sebebi, árbir dáriger kez kelgen adammen til tabysyp, sóılese alýy qajet.
«Hırýrgııa bólimshesiniń qyzmeti – aýrýhananyń aınasy. Al, hırýrgııasy jaqsy aýrýhana jaqsy kórsetkishterge ıe bolady. Bizdiń qalamyzǵa eńbegi sińgen, Kentaý qalasynyń medıtsınasynyń sara jolyn qalyptastyrǵan M.Ernazarov, Q.Sultanqulov sekildi aǵalarymyzdyń eńbek jolynan úlgi alyp jumys istep kelemiz. Bólimdegi áriptesterim óz jumystaryn jaqsy biledi. Olardyń eńbegin joǵary baǵalaımyn. Barshasy da medıtsınalyq qyzmettiń sapasyn jaqsartý úshin aıanbaı eńbek etip kele jatqan aq halatty abzal jandar» - deıdi hırýrg.
Búginde Jáńgirhan Bımahanuly Kentaý qalasynyń «Qurmet azamaty». Túrkistan oblysynyń «Eń úzdik hırýrgi», «V.M.Behterev», «Gıppokrat», «Túrkistan oblysyna sińirgen eńbegi úshin», ıÝneskonyń «ıAsaýı jyly», múgedekter qoǵamynyń «Qoldaýshy», Densaýlyq saqtaý mınıstrliginiń «Densaýlyq saqtaý isiniń úzdigi» tósbelgisiniń ıegeri. Qazaqstandyq endovıdeohırýrgtar assosatsııasynyń múshesi. 40-qa jýyq ǵylymı maqalanyń avtory.
Jubaıy Uldaı da – dáriger. Balalar endokrınology. Qazir qaladaǵy balalar emhanasynda jumys isteıdi. Jaıdary jup eki ul ósirip, nemere súıip otyr.
