Respondentterdiń 78 paıyzy Konstıtýtsııalyq reformany qoldaıdy — saýalnama

ASTANA. KAZINFORM — Prezıdent janyndaǵy Qazaqstannyń strategııalyq zertteýler ınstıtýtynyń dırektory Jandos Shaımardanov Konstıtýtsııalyq reforma jónindegi komıssııanyń búgingi otyrysynda Ata zańǵa engiziletin ózgeristerdi halyqtyń qalaı qabyldap jatqany týraly paıymyn aıtty. 

— Jaqynda «Qoǵamdyq pikir» ınstıtýty ótkizgen saýalnamanyń nátıjesin jarııalaǵan edi. Osy zertteýdiń nátıjesine sáıkes, respondentterdiń 79 paıyzy júrgizilip jatqan Konstıtýtsııalyq reformany ýaqtyly dep sanaıdy. Sonymen qatar, azamattardyń edáýir bóligi Konstıtýtsııadaǵy ózgeristerdi jeke ál-aýqatynyń artýymen, ómir sapasynyń jaqsarýymen tikeleı baılanystyrady, — dedi ol.

Onyń dereginshe, respondentterdiń 65 paıyzy usynylyp otyrǵan ózgerister olardyń ómirine oń áser etedi dep senedi.

— Nátıjesinde saýalnamaǵa qatysqandardyń basym kópshiligi, ıaǵnı, respondentterdiń 78 paıyzy Konstıtýtsııalyq reformany qoldaıtynyn bildirdi. Qoǵamdyq pikirdi zertteý kórsetkendeı, Konstıtýtsııalyq reforma — azamattardyń keńinen talqylaýǵa qatysýyna jáne qoǵamdyq qoldaýǵa súıenedi, — dedi ınstıtýt basshysy.

Aıta ketý kerek, ótken apta aıaǵynda jarııalanǵan jańa Konstıtýtsııanyń jobasynda memlekettik tildiń mártebesi týraly norma 9-bapta ornalasqan. Ol jerde memlekettik til — qazaq tili ekeni, al memlekettik mekemeler men ózin-ózi basqarý uıymdarynda orys tili memlekettik tilmen qatar qoldanylatyny aıtylǵan.