Reseılik alpınıst qaza tapty dep tanyldy

BІŃShKEK. KAZINFORM – Qyrǵyzstannyń alpınızm jáne sporttyq quzǵa órmeleý federatsııasynyń prezıdenti Edýard Kýbatov reseılik alpınıst Natalıa Nagovıtsyna qaza tapqanyn rastady. Bul týraly ol óziniń Instagram paraqshasynda habarlady, dep jazady Kazinform agenttiginiń menshikti tilshisi.

Qyrǵyz alpınısi Nagovıtsyna ornalasqan «Qus» jartasy mańyndaǵy jaǵdaıdy egjeı-tegjeıli beınequjattap kórsetken kadrlarmen bólisti. Beınematerıaldar 2 qyrkúıekte «Jeńis shyńy» baýraıyndaǵy «Ońtústik Enılchek» bazalyq lagerinen bıik ushatyn dronnyń kómegimen eki ret túsirilgen.

— Ókinishke qaraı, Natalıa Nagovıtsynada ómir belgileriniń joqtyǵyn málimdeýge májbúrmiz. Barlyq qutqarý operatsııasy toqtatyldy, bárimiz úshin aýyr bolsa da, osy qaıǵyly faktini moıyndaýymyz kerek. Beınematerıaldardyń barlyǵy (10 mınýttan asa) Natalıanyń ulyna tapsyrylady, — dep jazdy ol.

Edýard Kýbatov atap ótkendeı, qyrǵyz tarapy alpınısti qutqarýdy uıymdastyrý úshin barlyq múmkindikti jasaǵan, alaıda shyńnyń tym bıik bolýy, aýa raıynyń qolaısyzdyǵy, tikushaqtyń qonýyna jaǵdaıdyń bolmaýy jáne qutqarýshylardyń fızıkalyq jaǵdaıy kútken nátıjege jetýge múmkindik bermegen.

— «Jeńis shyńy» tarıhynda 7200 metr bıiktikte birde-bir sátti qutqarý operatsııasy bolǵan joq, sondyqtan biz qutqarýshy alpınısterdiń ómirine odan ári qaýip tóndirýge qaqymyz bolmady, — dedi qyrǵyz sportshysy.

Eske sala ketsek, 12 tamyzdan beri reseılik alpınıst Natalıa Nagovıtsyna synǵan aıaǵymen 7 myń metrden astam bıiktikte kómek kútýmen bolǵan. Onyń tómengi jaǵynda ıtalııalyq alpınıstiń denesi qalǵan. Ol jaraqat alǵan reseılik áıeldi tómen túsirýge tyrysqan, biraq qolynyń úsýinen jáne mı isinýinen kóz jumǵan.

23 tamyzda Qyrǵyzstan TJM qutqarýshylary aýa raıynyń nasharlaýyna baılanysty Reseı azamaty Natalıa Nagovıtsynany izdestirý jumystaryn toqtatty.

Keıin belgili bolǵandaı, 24 tamyzda Ystyqkól oblysyna jiberilgen Qyrǵyzstan TJM-niń «Airbus N-125» tikushaǵy aýa raıynyń kúrt nasharlaýyna baılanysty evakýatsııalaý operatsııasyn toqtatyp, turaqty ornalasqan jerine qaıtqan.

27 tamyzda Qyrǵyzstan UQK júrgizgen aerovıdeotúsirilim kezinde joǵary dáldikti qurylǵylarmen jabdyqtalǵan drondar Nagovıtsyna ornalasqan aýmaqta ómir belgilerin anyqtamady.

Sonymen birge, quramynda 20 tájirıbeli maman bolǵan alpınısterdiń sarapshy toby reseılik Natalıa Nagovıtsynany qutqarý múmkin emestigin málimdedi.