Reseıge kirgen sheteldikterdi tsıfrlyq baqylaý 2027 jylǵa deıin jalǵasýy múmkin
MÁSKEÝ.KAZINFORM - Reseıdiń Іshki ister mınıstrligi sheteldik azamattar men azamattyǵy joq adamdardyń Reseıge kirýi jáne odan shyǵýy qaǵıdalary men sharttaryna qatysty eksperımenttiń merzimin 2027 jylǵy 31 jeltoqsanǵa deıin uzartýdy kózdeıtin qaýly jobasyn daıyndady. Bul týraly MVD MEDIA telegram-arnasy habarlady.
Qazirgi ýaqytta atalǵan eksperımenttiń ekinshi kezeńi júzege asyrylýda. Onyń aıasynda sheteldik azamattar Memlekettik jáne mýnıtsıpaldyq qyzmetterdiń biryńǵaı portalynyń (fýnktsııalarynyń) — RuID qosymshasy arqyly Reseıge josparlanǵan kirý týraly elektrondyq habarlamalar joldaıdy.
Qaýly jobasynda sondaı-aq 2026 jylǵy 1 shildeden bastap vızasyz tártipte Reseıge eńbek qyzmetin júzege asyrý nemese oqý maqsatynda kirýdi josparlaǵan sheteldikterdiń osyndaı elektrondyq ótinimdi toltyryp, joldaýy mindetteletini kózdelgen.
Atalǵan talaptardy bekitý sheteldik azamattyń tsıfrlyq profılin qalyptastyrýdyń bir bóligi bolyp tabylady jáne bolashaqta sheteldikterge arnalǵan qyzmetterdi tolyqtaı tsıfrlyq formatqa kóshirýge múmkindik beredi — Reseı Federatsııasyna kirýdi josparlaýdan bastap el aýmaǵynan shyǵýǵa deıin.
Sondaı-aq bul shara kóshi-qon aǵyndaryn baqylaý júıesin jetildirýge baǵyttalǵan josparly jumystyń kezekti mańyzdy kezeńi ekeni atap ótiledi.
Sheteldik azamattyń tsıfrlyq profıli Reseıge kirýge qatysty qoldanystaǵy tyıymdar nemese shekteýler týraly aqparatty aldyn ala alýǵa múmkindik beredi.
Aıta keteıik, Reseı memlekettik Dýmasynda plenarlyq otyrystardy fotoǵa túsirýge tyıym salyndy.