Reseıge baratyn qazaqstandyqtar bıometrııalyq derek usynady
ASTANA. KAZINFORM – Qazaqstannyń Reseıdegi Elshiligi qazaqstandyqtarǵa úndeý jasady.
«Reseı Federatsııasy Úkimetiniń 2024 jylǵy 7 qarashadaǵy №1510 qaýlysyna sáıkes Reseıde elge kirý jáne shyǵý kezinde shetel azamattarynan (onyń ishinde Qazaqstan azamattarynan) jáne azamattyǵy joq adamdardan bıometrııalyq derekterin jınaý boıynsha eksperımenttik joba bastaldy», - delingen Elshilik habarlamasynda.
Eksperımenttiń birinshi kezeńinde, 2024 jylǵy 1 jeltoqsannan 2026 jylǵy 30 maýsymǵa deıin Máskeý qalasynyń halyqaralyq áýejaılaryna (Domodedovo, Sheremetevo, Vnýkovo jáne Jýkovskıı), sondaı-aq Orynbor oblysyndaǵy "Mashtakovo" avtomobıl ótkizý pýnkti arqyly keletin Qazaqstan azamattary bıometrııalyq derekterin – bet beınesi men saýsaq izderin tapsyrýǵa mindetti.
Ekinshi kezeńde, 2025 jyldyń 30 maýsymynan 2026 jyldyń 30 maýsymyna deıin eksperıment Reseıdiń memlekettik shekarasyndaǵy barlyq ótkizý pýnktterin qamtıdy. Bul kezeńde elge kirýshi árbir sheteldiktiń (onyń ishinde Qazaqstan azamattarynyń) tsıfrlyq beıini qalyptastyrylatyn bolady. Bul rette, mundaı beıindi RuID qosymshasy arqyly óz betinshe qurýǵa bolady, ol basqa memleketterdiń azamattary úshin memlekettik qyzmetterdiń analogy bolady jáne sapar týraly habarlaýǵa, sondaı-aq Reseı aýmaǵynda ártúrli memlekettik qyzmetterdi alýǵa múmkindik beredi (mysaly, medıtsınalyq saqtandyrýdy rásimdeý). Tsıfrlyq beıin birqatar memlekettik júıelerge, onyń ishinde memlekettik kórsetiletin qyzmetter júıesine engiziletin bolady.
Shekaradan ótý pýnktterindegi qosymsha tártipterge aldyn ala daıyn bolýdy usynamyz.
Atalǵan joba (eksperıment) talaptarynan:
– Reseıde akkredıttelgen dıplomatııalyq ókildikter men halyqaralyq uıymdardyń qyzmetkerleri jáne olardyń otbasy músheleri;
– dıplomatııalyq jáne qyzmettik pasporttardyń ıeleri;
– 6 jasqa deıingi balalar bosatylady.
