Reseıdiń Chelıabi oblysynda sý tasqyny bolyp jatyr

ASTANA.KAZINFORM — Reseıdiń Chelıabi oblysyndaǵy Asha qalasynda muz keptelisi men jaýyn-shashynnyń saldarynan Sıma ózenindegi sý deńgeıi kóterilip, 31 úı aýlasy sý astynda qaldy, dep habarlaıdy Kazinform agenttiginiń tilshisi. 

Aımaqtyq TJM málimetinshe, oqıǵa ornyna arnaıy órt-sóndirý jáne qutqarý bólimshesiniń kúshteri men pılotsyz ushý apparattary bar jumys toby jiberildi.

Okrýg ákimshiligi sý eki shaǵyn aýdanǵa jaıylǵanyn, qutqarýshylardyń oqıǵa ornynda jumys istep jatqanyn habarlady.

Kýágerlerdiń aıtýynsha, M-5 «Asha – Mınıar» tas jolynyń aınalma bóligi tolyqtaı jabylǵan.

Ashanyń soltústiginde, Sım ózeninde muz júrýi kezinde keptelis paıda bolyp, qalanyń soltústik-shyǵysynda ornalasqan Chapaevskıı jáne Kozınskıı aýyldaryn sý basty. Asha – Mınıar baǵytyndaǵy aımaqtyq mańyzy bar jolǵa jalǵasatyn kóshe sý astynda qaldy.

Sý basqan aýdandarda úı-úıdi aralaý jumystary júrgizilip, turǵyndardy evakýatsııalaýǵa daıyndyq júrgizilip jatyr, ýaqytsha ornalastyrý pýnkti ázirlendi. Zardap shekkender týraly málimetter ázirge joq.

Qazirgi ýaqytta ózendegi sý deńgeıi turaqtanǵany habarlandy.

Eske sala keteıik, buǵan deıin sý tasqyny Chelıabi oblysynyń ońtústigindegi turǵyn úılerge áser etken bolatyn. Keıbir eldi mekenderde de ýaqytsha ornalastyrý oryndary ashylǵan.

Buǵan deıin Qazaqstan men Reseı transshekaralyq ózender boıynsha tasqyn sýdyń aldyn alý maqsatynda kúndelikti aqparat almasýdy bastaǵany habarlanǵan edi.